Abahoze ari abakuru b'igihugu cya Leta zunze ubumwe z'Amerika babiri bamaze kumenyekanisha aho bahagaze ku birebana n'imihango yo kwimika perezida mushya Joe Biden na visi-perezida we Kamala Harris ku italiki ya 20 y'uku kwezi. Perezida Jimmy Carter ntazayijyamo. Naho Perezida George W. Bush azaba ayirimo.
Jimmy Carter, wo mu ishyaka ry'Abademokarate, yabaye perezida wa 39 wa Leta zunze ubumwe z'Amerika manda imwe, kuva mu 1977 kugera mu 1981. Ni umukambwe w'imyaka 96 y'amavuko.
Umuvugizi we yatangaje ko Carter n'umutegarugoli we, Rosalynn Carter w'imyaka 93, batazajya mu birori byo kwimika Joe Biden, ariko ko bamwoherereje, we n'uzamubera visi-perezida Kamala Harris, ubutumwa bwo kubashima no kubifuriza ishya n'ihirwe.
Ni ubwa mbere, kuva mu 1977, Jimmy Carter atazitabira imihango yo kurahiza perezida mushya wa Leta zunze ubumwe z'Amerika. Kubera gukura, afite utubazo tw'ubuzima, turimo kurwara rimwe na rimwe, cyangwa kwikubita hasi akavunika inshuro nyinshi.
Perezida George W. Bush, Umurepubulikani wategetse Leta zunze ubumwe z'Amerika imyaka umunani, kuva mu 2001 kugera mu 2009, we yatangaje ejo kuwa kabiri ko we na madame we, Laura Bush, bazajya mu birori byo kwimika Joe Biden na Kamala Harris. Umuvugizi wabo aragira, ati: "Kwirebera, uhibereye, ihererekanyabutegetsi mu mahoro ni ikimenyetso gikomeye cya demokarasi yacu kitajya gisaza."
Kugeza ubu, Perezida Donald Trump, wanze kwemera ko yatsinzwe, ntaratangaza ku mugaragaro niba azajya mu birori byo kwimika Biden.
Facebook Forum