Uko wahagera

FBI: Iterabwoba ry'Imbere muri Amerika Rikomeza Kwiyongera


Matthew Olsen yungirije minisitiri w'ubutabera, ari nawe mushinjacyaha mukuru

Leta zunze ubumwe z'Amerika irimo irubaka urwego rushya mu bushinjacyaha ruzaba rushinzwe gusa gukurikirana ibyaha by'iterabwoba ry'imbere mu gihugu. Iterabwoba ry'imbere muri Leta zunze ubumwe z'Amerika riragenda ryiyongera. Riterwa n'abantu bafitiye urwango andi moko, abatishimiye guverinoma n'ibyo bita ingengabitekerezo yayo. Uko ni ko Matthew Olsen yabitangarije Komite ya Sena igenzura inzego z'ubutabera.

Matthew Olsen yungirije minisitiri w'ubutabera, ari nawe mushinjacyaha mukuru. Akuriye ishami rishinzwe umutekano w'imbere mu gihugu. Yasobanuye ko anketi za FBI (ikigo cy'igihugu cy'ubugenzacyaha) ku iterabwoba ry'imbere mu gihugu zimaze kwikuba kabiri kuva mu kwezi kwa gatatu 2020.

Madame Jill Sanborn, umuyobozi wungirije wa FBI, nawe yabwiye Komite ya Sena ko mu mwaka ushize w'2021, ibitero bine by'iterabwoba ry'imbere mu gihugu byahitanye abantu 13. Avuga ko ababigizemo uruhare barimo abarakariye ingamba za guverinoma zo kwirinda Covid-19 cyangwa politiki zirebana n'abimukira, n'abemera ko amatora yibwe.

Matthew Olsen yasobanuriye Abasenateri ko arimo ashinga urwego rushya rwihariye mu ishami ayobora kugira ngo bakurikirane neza, uko bikwiye, ibi bibazo. Ubuhamya bwe na Jill Sanborn bwabaye icyumweru kimwe nyuma y'isabukuru ya mbere y'igitero cy'abayoboke b'uwari umukuru w'igihugu, Donald Trump, ku nteko ishinga amategeko, ku itariki ya 6 y'ukwa mbere 2021. Kugeza ubu, abantu barenga 725 bakigizemo uruhare bamaze gutabwa muri yombi.

Facebook Forum

XS
SM
MD
LG