Muri Etiyopiya, abantu ibihumbi bakomoka muri Tigreya batawe muri yombi bitwa abagambanyi mu ntambara imaze amezi arenga atanu mu majyaruguru y'igihugu.
Nk'uko ikigo ntaramakuru AP cyo muri Leta zunze ubumwe z’Amerika kibyemeza, abanyatigreya batabwa muri yombi bamara amezi n'amezi bafunze batazi ibyaha bazira kandi batagezwa mu bucamanza. Abenshi muri bo ni abasilikali. Abanyatigreya ni bo bari biganje mu ngabo z'igihugu kuva mu 1991.
Guverinoma ya minisitiri w'intebe Abiy Ahmed yemera ko yafunze abasirikari bake bo mu rwego rwo hejuru b'abanyatigreya, ariko AP yo yemeza ko ari benshi cyane. Uretse abasirikari, abakozi ba leta, abikorera ku giti cyabo, abapadiri, abaganga n'abaforomo, abanyamategeko, nabo barafungwa.
Komisiyo y'igihugu y'uburenganzira bwa muntu ya Etiyopiya ivuga ko abafungwa bataburanishwa uko bikwiye, ko bafite ibibazo kutabona imiti, kudasurwa n'ababo, kandi bamwe na bamwe batabasha no kubwira imiryango yabo aho bafungiye.
Umuryango w'Abibumbye uvuga ko uzi amakuru y'abanyatigreya bafungwa bazira ubwoko bwabo, ariko ko utazi uko bangana kubera ko ibyabo byose bibera mu bwiru bwa leta ya Etiyopiya. Naho Leta zunze ubumwe z'Amerika ivuga ko yahagaritse by'agateganyo imfashanyo isanzwe iha Etiyopiya kubera ikibazo cya Tigreya.
Facebook Forum