Etiyopiya irahamagarira abaturage kwifatanya mu rugamba, guhangana n’ingabo z’intara ya Tigreya mu gihugu. Ibiro bya Minisitiri w’intebe wa Etiyopiya, Abiy Ahmed, uyu munsi kuwa kabiri byahamagariye abanyetiyopiya bose babishoboye, kwinjira mu gisilikare, mu mutwe udasanzwe w’ingabo no mu mitwe y’abarwanyi, gushyigikira urugamba ku ngabo za Tigreya.
Itangazo rije hashize hafi ukwezi n’ibyumweru bibiri, nyuma y’uko guverinema itangaje ko ihagaritse imirwano ku ruhande rwayo mu ntara ya Tigreya, iherereye mu majyaruguru y’igihugu cya Etiyopiya.
Ntibyahise bishoboka kubona umuvugizi w’ingabo za Tigreya cyangwa uhagarariye Minisitiri w’intebe Abiy ngo bagire icyo babivugaho.
Intambara yadutse mu kwezi kwa 11 hagati y’ingabo z’igihugu cya Etiyopiya n’ingabo z’ishyaka Tigray People’s Liberation Front, zigenzura iyo ntara ya Tigreya.
Muri ibi byumweru bishize, imirwano yarakwirakwiriye, igera mu ntara za Amhara na Afar. Abantu bagera mu 170,000 bataye ibyabo nk’uko ONU ibitangaza.
Facebook Forum