Uko wahagera

DRC: Abakekwa Kuba Abarwanyi ba ADF Bishe Abanyagihugu 16


Zimwe mu modoka zigeze guturirwa na ADF

Abakekwaho kuba abarwanyi ba kiyislamu bishe abantu 16 mu mudugudu wo mu burasirazuba bwa repuburika ya demokarasi ya Congo. Abo bakekwa ko ari abarwanyi kiyislamu bishe abantu 16 banatwika amazu mw’ijoro ry’ejo kuwa gatatu mu burasirazuba bwa Congo, nk’uko uwabyiboneye n’uyobozi wa sosiyete sivili yabivuze.

Umuvugizi w’ingabo mu karere, mu gitondo cyo kuri uyu wa kane, yavuze ko abasilikare bari kw’irondo basakiranye n’abarwanya ubutegetsi, ariko ntiyagira ibindi bisobanuro atanga.

Luc Kakule Messo, umuturage wo mu mudugudu wa Kalembo, uri mu bilometero bigera muri 40 uvuye mu burasirazuba bw’umujyi wa Beni, yagize, ati: “Twarimo gusangira icyo kunywa n’inshuti, nuko mu buryo butunguranye twumva urusaku rw’imbunda. Ikintu cya mbere cyatujemo ni uguhunga. Mu gitondo cy’uyu munsi twabonye imirambo 16. Abapfuye barimo umuhungu wanjye w’impfura."

Mumbere Meleki Mulala, umuhuzabikorwa w’imiryango yo mu karere iharanira uburenganzira bwa muntu, yemeje umubare w’abapfuye. Kuri we, igitero cyakozwe n'inyeshyamba za ADF.

Umutwe wa ADF ugizwe n'abarwanyi bakomoka muri Uganda. Umaze imyaka ukorera mu mashyamba y’inzitane yo muri Repubulika ya Demokarasi ya Congo, hafi y’umupaka wa Uganda. Watangiye kwica umubare munini w’abasivili mu mwaka wa 2014. Mu mpera z’umwaka wa 2019, ingabo za Congo zatangije ibikorwa byaguye kuri uwo mutwe, bikongeza urugomo.

Mulala yagize, ati: “Birababaje kandi biteye agahinda kubera ko buri munsi tubara abapfuye”. Mu kwezi kwa gatanu gushize, guverinoma ya Congo yatangaje ko intara ya Kivu ya ruguru hamwe n’iya Ituri zari mu bihe bikomeye, izishyiramo ubutegetsi bwa gisilikare. Yashakaga guhagarika imivu y’amaraso, ariko umutekano w’abasivili wakomeje kuba nabi, nk’uko ikigo Kivu Security Tracker kibivuga.

Iki kigo gikorana ubushakashatsi n’umuryango urengera uburenganzira bwa muntu, Human Rights Watch ufite icyicaro cyawo gikuru i New York muri Leta zunze ubumwe z'Amerika.

Facebook Forum

XS
SM
MD
LG