Urubanza ruzatangira kuwa kabiri w’igitaha, tariki ya 9 y'uku kwezi.
Abanyamategeko batanu bagombaga kubaranira Trump bari bayobowe na Butch Bowers na Deborah Barbier, beguye mu mpera z’icyumweru gishize kubera kutumvikana na Trump ku mikorere yabo.
Nk'uko ibinyamakuru bitandukanye bibyemeza, Trump yashakaga ko bazaburana bashimangira ko yibwe amajwi mu matora ya perezida wa Repubulika yo mu kwezi kwa 11 gushize. Abanyamategeko be bo bashakaga kuburana bashyira imbere ko urubanza runyuranyije n'itegeko nshinga kuko rubaye Trump yaravuye ku butegetsi.
Trump yatangaje ko yahaye akazi irindi tsinda ry'abavoka riyobowe n'abitwa David Schoen na Bruce Castor. Shoen afite imyaka 67 y'amavuko. Ni inzobere mu by'amategeko mpanabyaha n'amategeko arengera uburenganzira bwa gisivili. Naho Castor afite imyaka 59 y'amavuko. Yazobereye mu mategeko mpanabyaha n'amategeko y'ubucuruzi na mbonezamubano. Yabaye umushinjacyaha wo ku rwego rw'igihugu. Muri iki gihe ni minisitiri w'ubutabera ku bw'ubusigire wa leta ya Pennsylvania, iri mu burasirazuba bwa Leta zunze ubumwe z'Amerika.
Mu cyumweru gishize ni bwo Umutwe w'Abadepite w'inteko ishinga amategeko ya Leta zunze ubumwe z'Amerika wagejeje muri Sena ikirego bita impeachment mu Cyongereza. Abadepite bashinja Perezida Trump icyaha kimwe cyo gushishikariza rubanda kwigomeka ku nzego z'ubutegetsi, igihe abayoboke be bagabaga igitero ku ngoro y'inteko ishinga amategeko, ku itariki ya 6 y'uku kwezi kwa mbere, cyahitanye abantu batandatu.
Facebook Forum