Urukiko mpuzamahanga mpanabyaha ruhoraho CPI ruratangaza ko rwatangiye anketi mu ntara za Palestina zigaruriwe na Israeli.
Mu itangazo yashyize ahagaragara, umushinjacyaha mukuru wa CPI, Fatou Bensouda, avuga ko izi anketi zizibanda ku byaha by'ubwicanyi bwinjira mu bubasha bw'uru rukiko, byaba byarakozwe kuva ku itariki ya 13 y'ukwezi kwa gatandatu 2014. Asobanura ko yafashe iki cyemezo nyuma y'isuzuma ryimbitse ibiro bye byakoze mu gihe cy'imyaka itanu, kandi ko anketi zizakorwa mu "bwigenge, nta kubogama, nta bwoba nta no kubera."
Mu 2019, yari yatangaje ko hari ibimenyetso byatumye asaba abacamanza ba CPI uruhushya rwo gukora anketi ari ngombwa ku byaha by'intambara ingabo za Isirayeli zishobora kuba zarakoze mu ntara ya Gaza no muri Cisjordania (West Bank mu Cyongereza), harimo na Yeruzalem y'uburasirazuba, zigenzurwa na Isirayeli kuva mu 1967. Umushinjacyaha mukuru wa CPI ateganya no kureba ibyaha by'intambara byaba byarakozwe n'imitwe y'Abanyapalestina, by'umwihariko umutwe wa Hamas.
Ku itariki ya 5 y'ukwezi kwa kabiri gushize, abacamanza bose b'urugereko rwa mbere rwa CPI bamuhaye ukuri, bavuga ko urukiko rufite ububasha bwo gukurikirana ibyaha by'intambara byakorewe muri ziriya ntara za Palestina, umunyamurwango wa CPI kuva mu 2015. Isirayeli yo ntiri mu bihugu bigize urukiko.
Isirayeli ntacyo iravuga kuri iki cyemezo gishya. Ariko mu kwezi gushize, nyuma y'itangazo ry'abacamanza ba CPI, minisitiri w'intebe wa Isirayeli, Benjamin Netanyahu, yabiteye utwatsi, avuga ko "atari urukiko ahubwo ari igikoresho cya politiki." Ati: "CPI ibangamiye uburenganzira bw'ibihugu bigendera ku mahame ya demokarasi bwo kwivuna iterabwoba.
Facebook Forum