Uko wahagera

COVID-19 Yageze mu Magereza Amwe Amwe mu Rwanda


Bamwe mu Bari muri Gereza ya Mageragere
Bamwe mu Bari muri Gereza ya Mageragere

Urwego rushinzwe amagereza mu Rwanda ruratangaza inzego z’ubuzima zatangiye kuvurira kuri Gereza abagororwa banduye Covid-19, ari nako ibikorwa byo gupima byiyongereye mu magereza yo hirya no hino mu gihugu.

Nyuma y’iminsi 3 muri gereza ya Tsinda iri mu karere ka Rwamagana habonetsemo abagororwa 13 banduye Covid-19, muri gereza ya Mageragere iri mu karere ka Nyarugenge naho haraye habonetse abagororwa 27 banduye iki cyorezo.

Uru rwego rusobanura ko kugeza ubu rutarasobanukirwa uburyo iyi ndwara yinjiye muri gereza, kuko kuva icyorezo cya Covid-19 cyagera mu Rwanda, Ubuyobozi bw’Urwego rw’Imfungwa n’Abagororwa, (RCS), rwari rwakomeje kurinda abagororwa iki cyorezo, hafatwa ingamba zirimo ko abajyanwa gufungirwa muri gereza bashya bagomba kwitwaza icyemezo cya Muganga ubyemerewe kigaragaza ko batarwaye icyorezo cya COVID-19. Umuyobozi w’urwego rushinzwe amagereza mu Rwanda Georges Rwigamba, yatangarije ijwi ry’Amerika ko bafashe ingamba zikomeye.

Naho Ubuyobozi bw’Urwego rw’Imfungwa n’Abagororwa, (RCS), buvuga ko budatahura ingene Covid-19 yabinjiranye, Ministre w’ubuzima aherutse gutangaza ko ubwandu bwa Corona bushobora kwinjizwa na bamwe mu bakora imirimo inyuranye mu magereza, ari nayo mpamvu nabo bagiye gufatirwa ingamba zikomeye.

Kuva iyi ndwara yagera muri gereza ya Nsinda mu karere ka Rwamagana, abantu batanu muri ako gace bamaze guhitanwa nayo mu minsi itatu gusa. Itangazo ryaraye risohowe na Minisiteri y’ubuzima, ryagaragazaga ko rivuga ko kuri uyu wa 11/11/ 2020, abantu 50 basanzwemo ubwandu bwa COVID-19 mu bipimo 2860 byafashwe, bituma umubare w’abamaze kwandura uba 5312 mu gihe barindwi bakize, abamaze gusezererwa mu bitaro baba 4974.

Kuva umurwayi wa mbere wa Corona virus agaragaye mu Rwanda, ku wa 14/3/ 2020, hamaze gufatwa ibipimo 577 736. Kuri ubu mu ngo ndetse n’ibitaro bivurirwamo abarwayi ba Covid-19 harimo 297 bari kwitabwaho n’abaganga umunsi ku wundi. Iyi ndwara kandi imaze guhitana 41.

Inama y’abaministre yaraye iteranye ku mugoroba wo kuri uyu wa gatatu, yasabye abanyarwanda gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta, abantu bakaraba intoki kenshi n’amazi n’isabune, kwirinda guhura bitari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Inkuru yateguwe n'umunyamakuru w'Ijwi ry'Amerika Assumpta Kaboyi

Corona Yageze mu Magereza y'u Rwanda Gute?
please wait

No media source currently available

0:00 0:04:16 0:00


Facebook Forum

XS
SM
MD
LG