Uko wahagera

Covid 19: Leta y'u Rwanda Yatangiye Gukingira Abujuje Imyaka 12 Kuzamura


Umwe mu banyeshuli bahawe urukingo

Leta y'u Rwanda kuri uyu wa kabiri yatangiye gahunda yo gukingira Covid-19 ingimbi n’abangavu kuva ku myaka 12 kugeza kuri 18.

Ni igikorwa cyahereye mu mashuri yo mu mugi wa Kigali, ariko kizagezwa no mu ntara nyuma. Ku kigo cy’amashuri cya Kagugu kiri mu murenge wa Kinyinya mu karere ka Gasabo kiri mu bya mbere byatangiriweho.

Iki kigo gifite abanyeshuri bagera ku bihumbi 9000, kibarura abagera ku bihumbi 2000 bari hagati y’imyaka 12 na 18 bagombaga gukingirwa.

Mbere yo gukingirwa, ababishinzwe barabanza kubaza abana niba bahawe urwandiko n’ababyeyi babo rubemerera guhabwa urukingo. Hakurikiragaho kubanza kubaza umwana niba yafashe amafunguro kuko abaganga bavuga ko gukingira umwana ushonje ashobora kugira ikibazo cy’isereri.

Abana bafashe iya mbere bagahabwa urukingo babwiye Ijwi ry’Amerika ko basanze ari urushinge nk’izo basanzwe baterwa. Bategekwaga kubanza kwicara iminota 15 mbere yo kujya mu zindi gahunda zabo.

Abaganga bavuga ko baba bagamije kureba niba nta kibazo urukingo rutwaye uwaruhawe.

Ministeri y’ubuzima itangaza ko abana bari hagati y’imyaka 12 na 18 abagera kuri miliyoni imwe n'ibihumbi magana inani ari bo bazakingirwa Covid-19 mu gihugu hose, mu gihe abari hejuru yayo kuva kuri 18 kuzamura hateganijwe gukingirwa abarenga miliyoni 5.

Imibare itangazwa na ministeri y’ubuzima igaragaza ko abantu barenga miliyoni eshanu n'igice ari bo bamaze guhabwa urukingo rwa mbere, mu gihe abakabakaba miliyoni eshatu bamaze guhabwa inkingo zombi.

Facebook Forum

XS
SM
MD
LG