Hongiriya izaha urukingo rwa gatatu rwa COVID-19 ababishaka kuva kw’italiki ya mbere y’ukwezi gutaha kwa munani kandi urukingo rwa virusi ya corona ruzaba itegeko ku bakozi bose bo mu nzego z'ubuvuzi.
Minisitiri w’intebe, Viktor Orban, yabitangarije kuri radiyo y’igihugu uyu munsi kuwa gatanu. Yavuze ko abaganga bazafata icyemezo ku rukingo abantu bakwiye guhabwa ku ncuro ya gatatu kandi ko rwagombye gutangwa amezi ane byibura nyuma y'urwa kabiri, keretse gusa abaganga basanze byakorwa ukundi.
Orban yavuze ko igihugu cye, gituwe n'abantu miliyoni 10, cyabaye kimwe mu byo mu Muryango w’Ubumwe bw’Ubulayi byihutiye gukingira abaturage babyo, mu gihe ari cyo kimwe rukumbi cyo muri uwo muryango cyatanze inkingo z’Uburusiya n’iz’Ubushinwa mbere y’uko zemezwa n’itsinda ryita ku bijyanye n’amategeko. Hongiriya yanakoresheje inkingo za Pfizer, Moderna na AstraZeneca, zikorerwa mu bindi bihugu bitari Uburisiya n'Ubushinwa.
Kugeza ejo kuwa kane, iki gihugu cyari kimaze gukingira abantu bacyo barenga miliyoni 5 n’ibihumbi 55, mu gihe umubare wose w’abanduye wazamutse ugera ku 808,661 na 30,013 bapfuye.
Itangwa ry’urukingo ryagenze buhoro mu byumweru bishize. Minisitiri w’intebe, Orban, yavuze ko mu minsi ya mbere y’ukwezi kwa cyenda mbere y’uko amashuri atangira, abana bafite kuva ku myaka 12 kugeza kuri 16 ku mashuri yose, bazaba bagejejweho urukingo.
Facebook Forum