Uko wahagera

Covid -19 Yateje Ikibazo mu Itangwa ry'Imisoro i Kigali


Inyubako y'ikigo cy'igihugu gishinzwe imisoro n'amahoro mu Rwanda

I Kigali mu Rwanda, abishyura imisoro k'ubukode bw’amazu irangirana n’uku kwezi kwa mbere, bafite impungenge ku bihano bishobora kubageraho, kubera gahunda ya 'guma mu rugo' yashyiriweho kwirinda icyorezo cya Covid-19.

Ikigo gishinzwe imisoro n’amahoro mu Rwanda cyo, kirasaba abaturage gukoresha ikoranabuhanga bamenyekanisha uwo musoro ndetse banawishyura.

Ikigo k’igihugu gishinzwe imisoro n’amahoro kivuga ko umusoro ku nyungu z’ubukode utangwa ku nyungu umuntu abona iturutse ku bukode bw’umutungo utimukanwa harimo inzu zo guturamo ndetse n’inyubako z’ubucuruzi. Kumenyekanisha no kwishyura uyu musoro bikorwa bitarenze itariki 31 z’ukwezi kwa mbere ukurikira umwaka wishyurira.

Kuri ubu, abasabwa uyu musoro batuye mu mugi wa Kigali, barasabwa kwishyura bifashishije ikoranabuhanga kuko umujyi wa Kigali washyizwe muri gahunda ya 'guma mu rugo' mu rwego rwo kwirinda ikwirakwira ry'icyorezo cya Covid -19.

Iki cyemezo cyateye impungenge bamwe mu barebwa n’uyu musoro batuye mu mujyi wa Kigali, cyane cyane abatamenyereye gukoresha ikoranabuhanga.

Bamwe mu bavuganye n'ijwi ry'Amerika barimo abageze mu za bukuru bemeza ko iri koranabuhanga batararisobanukirwa.

Si ikibazo cy'ikoranabuhanga kigoye abaturage gusa, kuko hari n’abagaragaje ko kugeza ubu bahuye n’ubukene bakuye mu kudakora neza kubera icyorezo cya Covid-19, bikaba byararushijeho kuzamba bitewe na gahunda ya 'guma mu rugo' yashyizweho mu mujyi wa Kigali mu rwego rwo kwirinda ikwirakwira ry'ikiza cya Covid 19.

Byaba ibibazo by'ubukene bwatewe n’imikorere mibi yazanywe na Covid-19 aho abantu batari bake batakaje imirimo yari isanzwe ibatunga, byaba ari 'guma mu rugo' muri Kigali, ikigo gishinzwe imisoro n'amahoro mu Rwanda kivuga ko ibi byose bidakwiye kugira uwo bibuza kwishyura kandi bakishyurira igihe.

Iki kigo kivuga ko kugeza ubu umuturage uzaba atishyuye mu minsi isigaye ngo ukwezi kwa mbere kurangire, azahura n’ibihano biteganywa n’itegeko.

Mu baturage bavuganye n’Ijwi ry’Amerika, hari abari bifuje ko uyu musoro bawusonerwa kubera ibihe bibi byabaguyeho batabyihamagariye, abandi bakumvikanisha ko biramutse bidakunze, bakongererwa igihe bazatangira uyu musoro.

Kugeza ubu itariki izwi abaturage basabwa kuzishyura uyu musoro n’iya 31 z’ukwa mbere, icyemezo cyo kuba basonerwa cyangwa bakongererwa igihe ntikirafatwa.

Facebook Forum

XS
SM
MD
LG