Uko wahagera

Congo: Martin Fayulu Yatanze Ikirego ku Byavuye mu Matora


Martin Fayulu na madamu we Esther imbere y'urukiko rurinda ubusugire bw'Itegeko Nshinga i Kinshasa taliki 12 ukwezi kwa mbere 2019.

Martin Fayulu wahatanye mu matora ya perezida muri Congo, yaregeye urukiko rurinda ubusugire bw'Itegeko Nshinga ku majwi yavuye mw’iryo tora. Yavuze ko yatsinze umukandida utavuga rumwe n’ubutegetsi, Felix Tshisekedi ko yamurushije amajwi menshi.

Urugaga rw’amashyaka atavuga rumwe n’ubutegetsi, Fayulu yari ahagarariye mu matora, kuwa gatanu rwavuze ko yabonye 61 kw’ijana by’amajwi.

Rwasubiragamo imibare yaturutse muri kiriziya Gaturika. Iyi kiriziya yashyize indorerezi z’amatora ibihumbi 40 mu mpande zose z’igihugu cya Congo.

Urwo rugaga rwavuze ko Tshisekedi yatsindiye 18 kw’ijana by’amajwi. Uko amategeko abiteganya, komisiyo y’amatora niyo yonyine ishobora gutangaza amajwi yavuye mw’itora.

Fayulu urinzwe iwe mu rugo na bamwe mu basirikare barinda perezida, yasabye ko amajwi yongera kubaruzwa intoki, ijwi ku rindi.

Kuwa kane, Leta zunze ubumwe z’Amerika, zari zasabye Congo, gushyira ahagaragara amajwi nyakuri. Zanaburiye ko hashobora gufatwa ibihano ku muntu wese wagerageza gutesha agaciro demokarasi ya Congo.

Amajwi byitezwe ko azemezwa bitarenze ejo ku cyumweru. Perezida mushya biteganyijwe ko azarahirira imirimo kw’italiki ya 15 y’uku kwezi kwa mbere.

Amaperereza yabaye mbere y’itora yerekanaga ko Fayulu yahabwaga amahirwe yo kuzasimbura perezida Joseph Kabila, washyigikiye undi mukandida wahoze ari minisitiri we w’intebe, Emmanuel Shadary.

Facebook Forum

XS
SM
MD
LG