Uko wahagera

Cardinal Pell Ashinjwa Guhohotera Utwana Yatsinzwe mu Bujurire


Cardinal George Pell

Muri Australia, Cardinal George Pell yatsinzwe no mu bujurire. Cardinal Pell yahoze ari umujyanama w’umushumba wa kiliziya gatulika y’isi yose, Papa Fransisko.

Mu butegetsi bwa Vatikani yari nimero ya gatatu, inyuma ya Papa Fransisko ubwe, n’umunyamabanga wa leta wa Vatikani, urwego ruri ku rugero rwa minisitiri w’intebe.

Cardinal Pell yahamwe n’ibyaha byo guhohotera utwana tw’uduhungu twari abahereza mu myaka y’1990 ubwo yari arkiyepiskopi wa Melbourne. Abacamanza bagumishijeho igihano yahawe mu kwezi kwa gatatu gushize ubwo urukiko rw’ibanze rwamukatiye igifungo cy’imyaka itandatu. Uyu munsi, yageze ku rukiko rw’ubujurire ari mu modoka ya gereza, ariko yambaye imyenda isanzwe.

George Pell afite imyaka 78 y’amavuko. Ni we wa mbere ukomeye muri kiliziya gatulika ukatiwe igifungo kubera gufata ku ngufu. Yasubiye muri gereza. Arateganya kujyana urubanza rwe mu rukiko rukuru rwa Australia.

Umuvugizi wa Vatikani, Matteo Bruni, yatangaje ko Papa Fransisko “yubaha icyemezo ubucamanza bwa Australia bwafatiye Cardinal Pell.” Yongeyeho ko “kiliziya gatulika itazatezuka ku butabera bw’abahohoterwa n’abakozi bayo.”

Ariko nta gihano Vatikani irafatira George Pell. Aracyari Cardinal.

Facebook Forum

XS
SM
MD
LG