Muri Myanmar, urukiko rwakatiye Aung San Suu Kyi igifungo cy'imyaka ine. Aung San Suu Kyi, w'imyaka 76 y'amavuko, afungiye ahantu hatazwi kuva aho abasilikare bahirikiye guverinoma ye ku italiki ya mbere y'ukwa kabiri gushize. Aregwa ibyaha bitandukanye, birimo kumena amabanga y'igihugu, ruswa, no kwiba amajwi mu matora yo mu kwezi kwa 11 mu 2020. Ishyaka rye, Ligue Nationale pour la Demorcratie, ryari ryayekunyemo amajwi y'ubwiganze busesuye, biba intandaro yo kumukorera kudeta.
Uyu munsi, urukiko rwamuhamije icyaha cyo gushishikariza rubanda kwigomeka ku ngoma y'abasilikare, rumukatira gufungwa imyaka ibiri, n'icyo kurenga ku mategeko yo gukumira ikwirakwira rya virusi ya Corona, nabwo rumukatira igifungo cy'imyaka ibiri. Yose hamwe rero iba ine. Urukiko rwayikuyemo amezi icumi amaze afunze.
Abanyamakuru ntibemerewe kwinjira mu rukiko. Naho abanyamategeko babikurikiranira hafi bemeza ko ibyaha byose Aung San Suu Kyi ashinjwa biramutse bimuhamye ashobora gukatirwa imyaka hafi ijana.
Abayoboke be bavuga ko ari imanza za politiki, zigamije kumubuza kongera kwiyamamariza kuyobora igihugu. Komiseri mukuru w'Umuryango w'Abibumbye ushinzwe uburenganzira bwa muntu,
Michelle Bachelet, nawe ni ko abyemeza. Yabyamaganiye kure.
Minisitiri w'ububanyi n'amahanga w'Ubwongereza, Liz Truss, avuga ko Aung San Suu Kyi na bagenzi be bafungiye amaherere. Arasaba abasilikare bategeka Myanmar kurekurwa infungwa za politiki, no gusubizaho inzira ya demokarasi. Myanmar yahoze ari koloni y'Ubwongereza.
Josep Borrell, umuyobozi w'urwego rw'ububanyi n'amahanga rw'Umuryango w'Ubumwe bw'Ubulayi, nawe arasaba ko infungwa za politiki n'abandi bose bafungiwe ubusa nyuma ya kudeta bafungurwa vuba kandi nta yandi mananiza.
Mbere y'uko Myanmar itangira inzira ya demokarasi mu 2015, Aung San Suu Kyi yari amaze imyaka 15 afungishijwe ijisho kubera kurwanya ingoma y'igitugu y'abasilikare bari ku butegetsi. Yabonye igihembo cy'amahoro kitiriwe Nobel mu 1991.
Facebook Forum