Uko wahagera

ANC ya Mandela Ifise Ubwoba bwo Gutsindwa mu Matora y'Uturere


Umwe mu bajejwe gucungera amatora ya Afurika y'Epfo

Muri Afrika y'Epfo, abaturage biriwe mu matora y'abayobozi b'uturere. Ishyaka ANC riri ku butegetsi rifite impungenge ko rishobora gutsindwa mu turere imaze imyaka n'imyaka iyobora.

Aya matora ni aya gatandatu kuva politiki y’”apartheid” ihirimye mu 1994. Kugira ngo ishishikarize abantu kujya gutora, leta yashyizeho aho bikingiriza virusi ya korona iruhande rw'ibiro by'amatora. Abaturage miliyoni 26 ni bo biyandikishije kuri miliyoni 40 z'abagejeje ku myaka yo gutora.

Perezida Cyril Ramaphosa yatoreye i Soweto, mu nkengero za Johannesburg. Yatangaje ko "Afrika y'Epfo ikwiye kwishimira intambwe igezeho muri demokarasi."

Kwiyamamaza byibanze cyane cyane ku buryo ANC, imaze imyaka 27 ku butegetsi, yananiwe gukemura ikibazo cy'imiturire myiza, no guteza imbere ibikorwa-remezo, nk'amashanyarazi n'amazi, n'ubukungu butanga imirimo muri rusange.

Ibipimo by'amatora byerekana ko abaturage benshi bashobora kwima amajwi yabo ANC, ku buryo ishobora gusubira inyuma kurusha mu myaka ishize. Mu matora aherutse yo 2016, ANC yatsinze amatora y'abayobozi b'uterere n'amajwi 54%. Ni yo make cyane yari ibonye bwa mbere na mbere kuva ikigera ku butegetsi. Icyo gihe yatakaje n'imijyi ikomeye nka Pretoria na Johannesburg.

Mu matora y'uyu munsi, ibipimo byerekana ko ANC noneho ahubwo ishobora kujya munsi y'amajwi 50%. Bikaba kandi n'ikitegererezo cy'amatora y'abadepite, ari yo avamo n'umukuru w'igihugu, ateganyijwe mu 2024

Facebook Forum

XS
SM
MD
LG