Uyu munsi, Leta zunze ubumwe z'Amerika yasubiye mu rukiko mu Bwongereza kurusaba kuyoherereza Julian Assange, umuyobozi wa Wikileaks. Leta zunze ubumwe z'Amerika irega Assange ibyaha 18 by'ubutasi, kwiba amabanga y'igihugu, akoresheje ikoranabuhanga, no kuyashyira ku karubanda.
Mu 2010 n'2011, Assange yatangaje muri Wikileaks, yashinze kandi ayobora, amabanga menshi cyane y'Amerika ya dipolomasi n'igisilikare ku ntambara zo muri Iraki n'Afghanistani, avuga ko yerekana uko Amerika ihonyorayo uburenganzira bwa muntu.
Amerika yaramushakishije. Mu 2012, yabashije guhungira muri ambasade ya Equateur mu Bwongereza. Yahamaze imyaka irindwi. Equateur yemereye polisi y'Ubwongereza kumuta muri yombi, iramusohora, maze arafatwa. Ubu amaze imyaka ibiri afunze.
Mu kwezi kwa mbere gushize, urukiko rw'ibanze rwanze kohereza Assange muri Amerika kuburanirayo. Amerika yarajuriye. Uyu munsi, urukiko rukuru rwatangiye kumva impande zombi. Urubanza rushobora gukomeza gukururana mu myaka iri imbere kuko uzatsindwa ashobora na none kujurira, akitura urukiko rw'ikirenga rw'Ubwongereza.
Julian Assange akomoka muri Australia. Afite imyaka 50 y'amavuko. Aramutse yoherejwe muri Amerika kuburanirayo, agatsindwa, ashobora gukatirwa kugera ku myaka 175 y'igifungo. Ariko umwe mu banyamategeko baburanira guverinoma ya Leta zunze ubumwe z'Amerika, James Lewis, avuga ko, kugeza ubu, igihano kiremereye inkiko z'Amerika zatanze ku byaha nk'ibyo Assange aregwa ari igifungo cy'amezi 63 (ni ukuvuga imyaka itanu n'amezi atatu). Aba banyamategeko babwiye urukiko ko Assange ashobora kuzajya kurangiriza igihano cye mu gihugu cye cya kavukire.
Facebook Forum