Intumwa z’Amerika zahuye n’abayobozi bakuru i Addis Abeba muri Etiyopiya mu rwego rwo kubamenyesha impungenge Perezida Joe Biden w’Amerika, atewe n’amakimbirane akomeje kuyogoza akarere ka Tigray n’ihohotera ry’uburenganzira bwa muntu muri icyo gihugu.
Kuri uyu wa gatandatu, izo ntumwa ziyobowe na Senateri w’Amerika Chris Coons zageze muri Etiyopiya kugira ngo zibonane na Minisitiri w’intebe Abiy Ahmed. Abari bitabiriye iyi nama yabereye mu muhezo, ni Minisitiri w’intebe wungirije wa Etiyopiya, Minisitiri w’ububanyi n’amahanga Demeke Mekonnen n’umuvugizi wa minisiteri y’ububanyi n’amahanga ya Etiyopiya, Ambasaderi Dina Mufti.
Gusa, nta bisobanuro byahise bitangwa ku biganiro byatanzwe na Senateri Coons. Kuva amakimbirane hagati ya guverinoma ihuriweho n’ingabo z’akarere ka Tigray mu kwezi kwa cumi na kumwe, abaturage ibihumbi amagana bahungiye muri Sudani.
Raporo ya guverinoma y'Amerika iherutse kwemeza ko igihugu cya Etiyopiya gifite gahunda ihamye yo gutsemba ubwoko muri Tigray. Ivuga kandi ko ingabo za Etiyopiya hamwe n’abarwanyi bitwara gisirikare baturutse mu karere ka Amhara, bagize uruhare mu ntambara ya Tigray mu rwego rwo gushyigikira Minisitiri w’intebe Abiy Ahmed. Kuri ibyo Amerika ikaba isaba ko hakorwa iperereza ryigenga ku byaha bivugwa mu ntambara.
Umuvugizi wa Minisiteri y’ububanyi n’amahanga Dina Mufi yavuze ko ikiganiro na Senateri Coons “cyubaka kandi ko Guverinoma ya Etiyopiya iri mu nzira yo gusobanura aho ihagaze kugira ngo guverinoma irusheho kubyumva no kwiga iki kibazo".
Facebook Forum