Uko wahagera

Amerika: Umudepite Ukomeye Yasabye u Rwanda Kurekura Paul Rusesabagina


Depite Carolyn Maloney

Urwo rwandiko ruvuga ko Leta y'u Rwanda yakoresheje uburyo bufifitse gushukashuka no guta muri yombi Bwana Rusesabagina,

Umukuru wa komite ngenzuzi y'Inteko Ishinga Amategeko y'Amerika, umutwe w'abedepite, Carolyn Maloney, yandikiye Perezida Paul Kagame w'u Rwanda amusaba kurekura vuba na bwangu no kugarura muri Amerika Bwana Paul Rusesabagina, wemewe n'amategeko y'icyo gihugu nk'umuturage wacyo.

Komite Carolyn Maloney abereye umuyobozi igenzura imikorere rusange ya Leta y'Amerika n'imiryango mpuzamahanga Leta zunze Ubumwe z'Amerika ibarizwamo.

Urwo rwandiko ruvuga ko Leta y'u Rwanda yakoresheje uburyo bufifitse gushukashuka no guta muri yombi Bwana Rusesabagina, bityo ikirengagiza inzira ziteganywa n'amategeko y'Amerika zerekeye gusaba no guhererekanya abakekwaho ibyaha. Ruvuga ko ibyo byishe itegeko ry'Amerika rigena inzira z'uko abakekwaho ibyaha birimo n'iby'iterabwoba bagomba gukurikiranwa cyangwa bagahabwa ibindi ibihugu bibakurikiranyeho ibirego nshinjabyaha.

Uwo mudepite avuga ko mu myaka 20 ishize, Amerika yohereje mu Rwanda abantu 4 bakekwaho ibyaha kandi ko izohereza abandi bane ni bangiza ibihano bakatiwe muri Amerika. Bityo akavuga ko Leta y' u Rwanda yarirengagije ubu bufatanye bwari busanzwe gahati y'ibihugu byombi igafata Bwana Rusesabagina mu buryo yise 'gushimuta' byishe amategeko y'Amerika bikanagaragaza icyizere gike Leta y'u Rwanda yifitiye mu kubona ibimenyetso simusiga bituma Rusesabagina afungwa.

Urwo rwandiko rukomeza ruvuga ko u Rwanda rukwiriye gushingira no ku mpamvu z'uburwayi bw'umutima n'ubw'umuvuduko mwinshi w'amaraso uyu Rusesabagina wahonotse uburwayi bwa canseri asanganywe, rukamurekura. Uyu mudepite abona ko muri iki gihe icyorezo cya Covid 19 gica ibintu, Ubuzima bwa Rusesabagina bushobora kuba buri mu kaga.

Carolyn Maloney ati: "Nk'umwe mu badepite b'inararibonye kandi uri mu itsinda rireba iby'ubuyobozi bushingiye kuri demokarasi, ndashaka gushimangira ko Inteko Ishinga amategeko y'Amerika, umutwe w'abadepite, ishyigikiye bikomeye Bwana Rusesabagina; ko dusaba Leta yanyu kumugarura vuba na bwangu kandi ari muzima"

Mu gusoza, uyu muyobozi yemeza ko Rusesabagina ari impirimbanyi y'uburenganzira bwa muntu ishimwa ku rwego mpuzamahanga; izwi kuba yararokoye abantu 1,268 muri jenoside yakorewe abatutsi mu Rwanda mu 1994. Akongera gusaba Leta y'u Rwanda ko ku nyungu z'umubano mwiza wayo n'Amerika, yamurekura vuba na bwangu ikamusubiza muri Leta zunze Ubumwe z'Amerika.

Facebook Forum

XS
SM
MD
LG