Uko wahagera

Amerika n'Abatalibani Bari Hafi y'Amasezerano y'Amahoro


Bamaze umwaka n’amezi atandatu mu mishyikirano mu mujyi wa Doha muri Qatar

Leta zunze ubumwe z’Amerika n’Abatalibani bo muri Afuganistani bashobora gushyira umukono ku masezerano y’amahoro ku italiki ya 29 y’uku kwezi.

Bamaze umwaka n’amezi atandatu mu mishyikirano mu mujyi wa Doha muri Qatar. Intambara barwana yatangiye mu 2001, ubwo Amerika yateraga muri Afghanistani ihirika ubutegetsi bw’Abatalibani.

Ku buryo butarabaho, igisonga cy’umukuru w’Abatalibani, Sirajuddin Haqqani, yatangarije uyu munsi abaturage b’Amerika “Icyo Abatalibani Bifuza” mu nyandiko yatambukije mu kinyamakuru “The New York Times.”

Aragira, ati: “Turahiye ko tuzubahiriza 100 ku ijana amasezerano twitegura gusinya na Leta zunze ubumwe z’Amerika. Ntawe utarambiwe iyi ntambara. Ntawe itahitaniye byibura umuntu umwe yakundaga. Ndahamya ko ubwicanyi n’iyicarubozo bigomba guhagarara.”

Haqqani avuga kandi ko Abatalibani biteguye kuzagirana ubutwererane n’Amerika nyuma y’intambara, ndetse no kuganira na guverinoma iyobora Afghanistani muri iki gihe.

Kugeza ubu, Abatalibani banze gushyikirana na leta y’Afuganistani.

Sirajuddin Haqqani akuriye umwe mu mitwe y’Abatalibani witwa Haqqani. Leta zunze ubumwe z’Amerika yawushyize ku rutonde rw’imitwe y’iterabwoba.

Leta zunze ubumwe z’Amerika yemereye amadolari miliyoni zigera ku icumi umuntu wese wazatuma Sirajuddin Haqqani ashyikirizwa ubutabera bw’Amerika.

Facebook Forum

XS
SM
MD
LG