Muri Afrika y'Epfo, Perezida Cyril Ramaphosa yasubijeho ingamba zikaze zo kurwanya icyorezo cya virusi ya Corona.
Afrika y'Epfo imaze kurenza umubare wa miliyoni w'abantu banduye virusi ya Corona. Imaze gupfusha abarenga ibihumbi 26,700. Yugarijwe kandi n'ubundi bwoko bushya bw'iyi virusi, bwanduza cyane byihuse kurusha isanzwe izwi.
Kubera izo mpamvu, Perezida Ramaphosa yakoresheje inama yihutirwa ya guverinoma ye, n'indi y'Inteko yihariye y'igihugu ishinzwe kurwanya virusi ya Corona. Nyuma y'izi nama ebyiri, umukuru w'igihugu cy'Afrika y'Epfo yavugiye ijambo kuri televiziyo abwira abaturage be ingamba zikomeye bibaye ngombwa ko asubizaho.
Babujijwe kuva mu ngo zabo kuva saa tatu y'ijoro kugera saa kumi n'ebyiri mu gitondo, kereka abakora mu nzego z'ubuvuzi n'iz'umutekano.
Amaguriro y'inzoga zisindisha, harimo n'ubunywero, birafunze. Ibirori n'imihango ihuza abantu benshi imbere mu mazu no hanze birabujijwe mu gihe cy'iminsi 14 guhera kuri uyu wa mbere saa sita y'ijoro, kereka mu kiriyo, mu buriro, mu mazu ndangamurage cyangwa ndangamuco, mu mazu ya siporo na kazino.
Perezida Ramaphosa yavuze ko kwambara agapfukamunwa n'amazuru ari itegeko ahahurira abantu benshi. Uzabirengaho ashobora gucibwa ihazabu cyangwa gufungwa.
Afrika y'Epfo ni cyo gihugu cya mbere kibasiwe cyane kurusha ibindi ku mugabane w'Afrika.
Facebook Forum