Uko wahagera

Irani: Abantu Batanu Baguye Mu Myigaragambyo


Amwe mu masanamu ya kera yerekana imyigaragambyo muri Irani

Ejo bundi kuwa mbere polisi yarwanye n’abayoboke b’ishami rya Kisilamu ryitwa Sufi mu murwa mukuru Teherani. Abashinzwe umutekano 5 barishwe. Aba-Sufi barenga 300 batawe muri yombi.

Aba-Sufi bagize ishyirahamwe ryitwa Gonabadi bari bagiye kuri sitasiyo ya polisi gusaba gufungura bagenzi babo batawe muri yombi mu minsi ishize. Basabaga kandi ko polisi ikuraho bariyeri zayo zikikije urugo rw’umuyobozi w’aba-Gonabadi, umukambwe w’imyaka 90 witwa Noor Ali Tabandeh.

Polisi yagerageje kubirukana no kubasanza. Gushyamirana bitangira ubwo. Umuvugizi wa polisi yatangaje ko, uretse abapfuye n’abafunzwe, abandi bapolisi 30 nabo bakomeretse. Ntiyasobanuye abapfuye mu ba-Sufi, ariko bo batangaje ku rubuga rwabo rwa Internet ko umwe mu bayoboke babo yishwe.

Leta ya Irani, iyobowe n’abo mu ishami rya Isilamu ry’aba-Shiite, ifata aba-Sufi nk’abantu bataye umurongo. Umubare w’aba-Sufi muri Irani ntuzwi neza ariko ni bo bake cyane mu mashami yose ya Isilamu. Umuryango w’Abibumbye na Leta zunze ubumwe z’Amerika bemeza ko leta ya Irani ihora ibaberabeza, ibafungira ubusa, ibabuza uburenganzira bwabo bw’idini uko baryumva kandi baryemera.

Bamwe mu bahanga babikurikiranira hafi babwiye Ijwi ry’Amerika ko amahane y’ejobundi kuwa mbere ashobora kuba ari mu rwego rw’imyigaragambyo yo kwamagana leta ya Irani yabaye mu mijyi irenga 80 mu kwezi kwa 12 gushize. Imyigaragambyo yaguyemo abantu 25.

Facebook Forum

XS
SM
MD
LG