Igisasu cyatezwe mu modoka n'ibitero by'imitwe y'abitwaje intwaro muri Afuganistani cyahitanye abantu 22 harimo abakozi b'inzego z'umutekano n'abasivili nkuko byatangajwe kuri uyu wa gatandatu n'inzego z'ubutegetsi muri icyo gihugu.
Abandi bantu 70 biganjemo abasivili bakomerekeye muri icyo gitero. Umuvugizi wa ministeri y'ubutegetsi bw'igihugu muri Afuganistani Tariq Arian kuri uyu wa gatandatu yavuze ko igitero cyabo cyari kigamije ikigo cya polisi kiri ahitwa Herat hafi y'umupaka wa Irani.
Irani yavuze ko cyangije amazu 14 muri ako gace. Abahatuye bavuze ko abantu 60 harimo abagore 20 n'abana 12 bari mu bakomerekejwe n'icyo gitero. Batanu muri bo bakomeretse cyane nkuko byemezwa n'inzego z'ubuvuzi muri Herat. Ntawe urigamba icyo gitero.
Umuvugizi w'umutwe w'Abatalibani yavuze ko ntaho uhuriye n'icyo gisasu. Ariko Perezida Ashraf Ghani w'Afuganistani yashinje Abatalibani kuba inyuma yacyo avuga ko bakomeje intambara ku gihugu cye kandi ko nta gahunda bafite yo kurangiza ikibazo bafitanye mu mahoro.
Ikindi gisasu cyaturikiye i Tarinkot mu murwa mukuru w'intara ya Uruzgan gihitana abasivili batatu gikomeretsa abandi bane nkuko bitangazwa n'inzego z'ubutegetsi zaho. Nta wigambye icyo gitero.
Ariko Abatalibani bagabye ibitero mu ntara za Kunduz na Balkh zo mu majyaruguru y'igihugu bica abasirikare 11 ba leta bakomeretsa abandi batandatu nkuko umwe mu babibonye utashatse ko izina rye ritangazwa yabibwiye Ijwi ry'Amerika.
Facebook Forum