Abanduye Virusi ya Corona Ku Isi Bageze kuri Miliyoni 104

Kaminuza ya Johns Hopkins ikora ubushakashatsi kuri virusi ya Corona yatangaje kuri uyu wa gatanu ko abanduye iyo virusi hirya no hino ku isi bamaze kugera kuri miliyoni 104, mu gihe imaze guhitana abagera kuri miliyoni 2.2

Leta zunze ubumwe z'Amerika niyo ifite umubare munini w'abanduye virusi ya Corona, ubu bamaze kurenga miliyoni 26. Hakurikiraho ubuhinde bugeze kuri miliyoni 10.8 z'abanduye naho Brazil iza ku mwanya wa gatatu ikabarurwamo miliyoni 9.3 banduye iyo ndwara.

Muri Amerika abakozi bo mu nzego z'ubuvuzi basabye abaturage kwitwararika mu gihe hitegurwa imikino ngarukamwaka ya Super Bowl, bakirinda uburyo bwose bashobora kwanduzanya.

Ubusanzwe usanga abantu bawukurikira muri za televiziyo bari mu matsinda cyangwa basangira mu tubari no mu mazu afungurirwamo ariko abashinzwe inzego z'ubuzima muri Amerika basabye abaturage kuguma mu rugo bagakurikirana iyo mikino n'abo mu muryango wabo.