Muri Etiyopiya, baracyabarura abantu baguye mu myigaragambyo yo mu cyumweru gishize kandi imibare iriyongera. Polisi ivuga ko bamaze kuba 239. Nk'uko komiseri wungirije wa polisi mu ntara ya Oromo, Mustafa Kedir, yabivuze uyu munsi kuri televiziyo yitwa Walta, ishamikiye ku ishyaka riri ku butegetsi, abantu 228 ni abasivili, abandi 11 ni abapolisi.
Abenshi bapfiriye mu ntara ya Oromia, ikikije umurwa mukuru Addis-Abeba. Polisi kandi ivuga ko imaze guta muri yombi abantu ibihumbi bitatu na 500. Imyivumbagatanyo yatewe n'iyicwa ry'umuhanzi w'icyamamare Hacalu Hundessa wo mu bwoko bwa Oromo, bwiganje muri Etiyopiya. Yarashwe n'abantu bataramenyekana mu murwa mukuru Addis-Abeba mu ijoro ryo ku italiki ya 29 y'ukwezi gushize. Internet irafunze muri Etiyopiya kubera iyi myivumbagatanyo.
Facebook Forum