Inteko ishinga amategeko ya Leta zunze ubumwe z'Amerika irimo irajya impaka za nyuma mbere yo kwemeza burundu itegeko ry'amadolari hafi miliyari ibihumbi bibiri yo kurwanya Covid n'ingaruka zayo.
Iri tegeko rimaze iminsi riri mu mpaka ndende.Abademokarate n'Abarepubulikani ntibaryumvikanaho na gato. Ryabanje mu badepite, baryemeza nta Murepubulikani n'umwe urihaye ijwi. Rigeze muri Sena, nabwo ryatambutse ku majwi y'Abademokarate bonyine gusa. Ryagarutse mu badepite, bagomba kuryemeza bwa nyuma mbere y'uko rijya ku meza y'umukuru w'igihugu, Joe Biden, kugirango arishyireho umukono uriha ingufu z'itegeko burundu.
Mu byo impande zombi zananiwe kumvikanaho, harimo umushahara w'ifatizo. Guverinoma ya Perezida Biden yari yashyize mu mushinga w'itegeko ko uyu mushahara uva ku madolari 7,5 ukagera kuri madolari 15 ku isaha. Abarepubulikani barabyanze, bivamo.
Abarepubulikani kandi barega iri tegeko ko riteganya gupfusha ubusa imali ya rubanda. Bavuga ko batabona neza icyo azakoreshwa. Abademokarate bo bavuga ko iri tegeko rizagabanya umubare w'abakene mo kabiri.
Itegeko riteganya imfashanyo imwe rukumbi y'amadolari 1,400 kuri buri muturage ufite umushahara mutoya, n'andi madolari 300 ya buri cyumweru, kugera mu kwezi kwa cyenda gutaha, ku bantu batakaje akazi muri ibi bihe bya Covid. Riteganya kandi guha amamiliyari y'amadolari guverinoma za leta zigize igihugu, inzego z'ubutegetsi z'ibanze, amashuli, n'ibigo by'ubucuruzi bito bito kugirango bashobore guhangana na Covid n'ingaruka zayo. Andi mamiliyari agomba kujya mu buvuzi n'inkingo za Covid.
Kubera ubwiganze bwabo mu badepite, Abademokarate bafite icyizere cyo kwemeza iri tegeko, riza kuba ari irya mbere na mbere rikomeye guverinoma ya Perezida Biden itsindiye. Ibyegeranyo bitandukanye byatangajwe muri iyi minsi byerekana ko byibura abaturage 70% b'ingeli zose ba Leta zunze ubumwe z'Amerika bashyigikiye iri tegeko.
Facebook Forum