Perezida w’Urwanda, Paul Kagame, yavuguruye guverinoma ye ku wa gatandatu tariki ya 11 Werurwe 2006.
Mu ivugurwa rya guverinoma ryakozwe, aba minisitiri batatu bavuye muri guverinoma, ari bo minisitiri wari ushinzwe ibidukikije, Mugorewera Drocella, minisitiri wari ushinzwe ibikorwa remezo, Bizimana Evariste, na Minisitiri wari ushinzwe umurimo, Bumaya Andre.
Aba minisitiri bane binjijwe muri guverinoma, ari bo Dogiteri Mujawamariya Jeanne d’Arc, Minisitiri w’umutekano, Shehi Musa Fazirri Harerimana wari usanzwe ari Guverineri w’Intara y’I Burengerazuba, minisitiri w’ibikorwa remezo, Kamanzi Stanislas na Minisitiri w’inganda, Mitari.
Aba minisitiri batatu bahinduriwe minisiteri, ari bo Musoni James wavuye ku nganda agashingwa minisiteri y’imari, Bazivamo Christophe wavuye k’umutekano agashingwa minisiteri y’ibidukikije, Murenzi wavuye k’uburezi agashingwa minisiteri muri perezidansi ishinzwe ubumenyi n’ikoranabuhanga, na Nshuti wavuye kuri minisiteri y’imari agashingwa minisiteri y’umurimo.
Aba minisitiri icumi bagumye mu myanya yabo, aribo uw’ubutegetsi bw’igihugu Musoni Protais, uw’ubuhinzi Murekezi, uw’ubuzima Ntawukuriryayo, uw’ingabo Gatsinzi, uw’ubucamanza Mukabagwiza, uw’imikino Habineza, uw’ububanyi n’amahanga Murigande, minisitiri muri perezidansi Nyirahabimana, uw’itangazamakuru Nkusi, n’uw’uburinganire Nyirahabineza.
Abakurikiranira hafi ibya poritiki yo mu Rwanda batangarije Ijwi ry’Amerika ko batunguwe no kuba minisiteri zagumye uko zanganaga; ngo bari biteze igabanuka rya za mininisiteri mu ivugurura rya guverinoma.
