Ishami ry’Umuryango w’Abibumbye ryita ku buzima, OMS, rivuga ko indwara ya muryamo yo mu bihaha mu majyaruguru ya Congo Kinshasa imaze gufata abacukuzi ba diamant 350, no guhitana abandi 61. OMS ivuga ko ngo igiye kwohereza byihutirwa abantu bayo ahitwa Zobia, mu birometero 300 mu majyaruguru ya Kisangani.
Umuganga wa OMS, Dr. Eric Bertheart, avuga ko hari abandi bacukuzi bagera ku bihumbi 4 ngo bahunze ako karere bagenzi babo bagitangira gufatwa n’iyo ndwara, bahungira ku mirenge iri hafi aho no mu bihuru.
Indwara ya muryamo yo mu bihaha ntikunze kuboneka, ariko iyo yadutse igarika ingogo. Irandura cyane, k’uburyo umurwayi ashobora kwanduza abandi akoroye cyangwa yitsemuye gusa.