Umushikiranganji ajejwe imigenderanire ya Amerika n’ayandi makungu
Marco Rubio uno munsi ku wa Mungu araja I Jeddah muri Arabiya Sawudite mu biganiro vyo kuraba ingene intambara y’Uburusiya na Ukraine ihera.
Ubushikiranganji bw’imigenderanire ya Amerika n’ayandi makungu buvuga ko ku wa gatanu w’indwi iheze, Rubio yakoranye ikiganiro co kuri terefone na mugenzi wiwe wo muri Ukraine, Andrii Sybiha, amubwira ko Prezida Donald Trump yipfuza ko intambara iri hagati ya Ukraine n’Uburusiya ihera kandi vyihuse.
Muri ico kiganiro, Rubio yamubwiye kandi ko impande zose zibwirizwa gufata ingingo zituma haboneka amahoro arama.
Umushikiranganji ajejwe imigenderaniore ya Amerika muri Arabiya Sawudite aza kujana n’umuhanuzi mukuru mu vy’umutekano wa Amerika Mike Waltz, hamwe na Steve Witkoff, intumwa idasanzwe ya Prezida Donald Trump ku kibazo ca Ukraine n’Uburusiya.
Witkoff yabwiye abamenyeshamakuru ko uru rugendo rugamije ahanini gushiraho ikiranga minsi c’intambwe zoshikana ku masezerano y’amahoro, n’izoshikana ku gahengwe k’intambara.
Prezida wa Ukraine, Volodymyr Zelensky, n’abategetsi batandukanye b’ico gihugu, nabo bazoshika muri Arabiya Sauwudite ejo ku wa mbere.
Abategetsi bazojana na Zelensky, barimwo Andriy Yermak ajejwe ibikorwa vyose mu biro vyiwe, umushikiranganji wo kwivuna abansi, Rustem Umerov, n’umukuru w’ibiro vya gisirikare Pavlo Palisa.
Inyuma y’urugendo rwa Zelensky, abategetsi bamuherekeje bazoca baguma muri Arabiya Sawudite, kugira bakorane ibiganiro n’intumwa za Amerika zizoba ziri muri ico gihugu.
Ibiganiro vya Amerika na Ukraine bigiye kuba inyuma y’indwi zitatu, habaye ivy’abategetsi ba Amerika n’Uburusiya. Nabo nyene bahuriye
I Riyadh muri Arabiya Sawudite.
Ukraine yavuze ko ifise ishaka ryo gukora ibiganiro vyubaka kandi yizeye ko bizohera hafashwe ingingo zifatika. Ku rubuga rwiwe rwa X, prezida w’ico gihugu Volodymyr Zelensky, yanditse ko “ Ku musogonda wa mbere w’intambara y’Uburusiya, Ukraine yamye yipfuza amahoro. Ingingo zifatika zo kuja ku meza y’ibiganiro zirahari, igikenewe, ni ukwihutisha ibiganiro. (State Department)
Forum