Umushikiranganji ajejwe imgenderanire wa Reta Zunze Ubumwe za Amerika, Marco Rubio, mw'ijoro ryo ku musi wa mbere, yatangaje ko Prezida wa El Salvador, Nayib Bukele, yemeye kwakira abirukanywe muri Amerika b'ubwenegihugu ubwari bwo bwose, harimwo Abanyamerika bakoze ivyaha bikomeye bapfungiwe muri iki gihe muri Amerika.
Umushikiranganji ajejwe imigenderanire wa Amerika, Marco Rubio, yatangaje ko Prezida wa El Salvador, Nayid Bukele, yemeye amasezerano adasanzwe yerekeye abimukira atari bwabe ahantu na hamwe kw’isi imbere yaho.
Hari mu birori vyo gutera igikumu ku masezerano atandukanye n’umushikiranganji ajejwe imigenderanire wa El Salvador, yerekeye ubuhinga bwa nucleaire bukoreshwa mu buryo bw’igisivile. Maroc Rubio, yatangaje ko Prezida Bukele yemeye kwakira abantu bakoze ivyaha bikomeye muri iki gihe bari mu mabohero muri Amerika, naho ari Abanyamerika canke bafise ibipapuro bibaha uburenganira bwo kuba muri Amerika.
Marco Rubio yabitangaje inyuma y’uko abonanye na Prezida Bukele mu kiringo c’amasaha atari make, hanze y’umurwa mukuru wa El Salvador, San Salvador. Inyuma y’uko Rubio, ashikirije ijambo, umutegetsi w’umunyamerika, yatangaje ko ata migambi reta ya Prezida Trump ifise yo kwirukana mu gihugu
Abanyamerika bafise ubwenegihugu. Yavuze yamara ko ivyo Prezida Bukele yemeye ari ibintu bihambaye cane. Yavuze ko reta ya Amerika idashobora kwirukana abanyagihugu bayo, ko ingingo nk’iyo ishobora guhinyuzwa bikomeye mu masentare.
Umushikiranganji ajejwe imigenderanire wa Reta Zunze Ubumwe za Amerika, Marco Rubio, yariko agendera El Salvador, kugira asabe reta y’ico gihugu icuditse na Amerika gukora kurushiriza mu ntumbero yo kwubahiriza ibisabwa na reta ya Prezida Trump ku bijanye no gufatira ingingo zikomeye cane abimukira. (ASSOCIATED PRESS)
Forum