Muri iki cyumweru, imiryango irenga 2.000 y’abanyamozambike yahungiye muri Malawi, nk'uko abategetsi ba Malawi babitangaje, mu gihe bivugwa ko abantu babarirwa muri mirongo, baguye mu mvururu zaturutse ku kutumvikana ku itora ryabaye mu mwezi kwa 10.
Amwe mu maduka harimo n’amabanki byari bifunze mu murwa mukuru wa Mozambike, Maputo, kuri uyu wa gatanu, kandi hashyizweho amarondo mu turere tumwe na tumwe. Ni nyuma y'uko abagororwa bagera ku 6.000 batorotse gereza ejobundi kuwa Gatatu.
Mozambike imaze amezi agera kuri abiri irimo imyigaragambyo ivanze n’urugomo, kuva aho komisiyo y’amatora ivugiye ko ishyaka riri ku butegetsi rya Frelimo ryabugumanye kandi ko umukandida waryo yatsindiye umwanya wa perezida muri ayo matora.
Frelimo ihakana ibirego by'abatavuga rumwe nayo, bayivuzeho uburiganya mu matora.
Icyemezo cy’akanama gashinzwe iyubahirizwa ry’itegeko nshinga rya Mozambike cyahamije ibyavuye mu matora kuwa mbere, gituma haba indi myigaragambyo.
Itsinda rishinzwe gukurikirana iby’iyo myigaragambyo, Plataforma Decide, rivuga ko abantu 125 bapfuye kuva icyemezo cy’urukiko gitangajwe na 252 guhera mu mpera z’ukwezi kwa 10.
Umwe mu bayobozi bakuru ba Malawi, yavuze ko kugeza kuwa gatatu, abanyamozambike 2.182 bahunze urugomo bambutse, bakinjira mu ntara ya Nsanje muri Malawi, ihana imbibi na Mozambike. (Reuters)
Forum