Ishami ry’umuryango w’abibumbye ryita ku buzima OMS, rivuga ko kugeza ubu muri uyu mwaka, muri Afurika hatangajwe abantu hafi 30.000 bakekwaho indwara y’ubushita bw’inkende.
Abenshi muri abo ni abo muri Repuburika ya demokarasi ya Kongo aho ibipimo by’iyi ndwara byashize, nk’uko OMS yabitangaje kuri uyu wa mbere.
Iri shami rya ONU ryongeyeho ko abantu barenga 800 bapfuye bakekwaho ubushita bw’inkende mu mpande zose z’uyu mugabane muri icyo gihe kimwe.
OMS yakomeje ivuga ko Repuburika ya Santrafurika n’Uburundi, nabyo byibasiwe n’ubushita bw’inkende bugenda bwiyongera.
Mu itangazo ryayo, OMS ntiyatanze imibare igereranya imyaka yashize n’uyu turimo. Urugaga rw’ubuzima muri Afurika rwavuze ko habonetse abarwayi 14.957 na 739 bapfuye, hashingiwe ku mibare yaturutse mu bihugu birindwi byibasiwe n’iyi ndwara mu mwaka wa 2023. Ni ubwiyongere bwa 78.5 kw’ijana by’ubwandu bushya, uhereye kuri 2022.
Icyo gihe, abantu 29.342 barwaye iyi ndwara kandi 812 bahitanywe na yo mu mpande zose z’Afurika guhera mu kwezi kwa mbere kugeza tariki 15 y’ukwezi kwa cyenda uyu mwaka, nk’uko OMS ibitangaza.
OMS yavuze ko abantu 2.082 bose hamwe bemejweho iyo ndwara hirya no hino kw’isi mu kwezi kwa munani kwonyine. Niwo mubare uri hejuru kuva mu kwezi kwa 11 k’umwaka wa 2022.
Kuri uyu wa gatandatu, ikigega cya Banki y’isi yose, cyavuze ko gishobora gutanga miliyoni 128.89 z’amadolari, ku bihugu 10 by’Afurika, yo gufasha kurwanya icyorezo cy’ubushita bw’inkende. (Reuters)
Forum