Dicksosn Ndieme yagirijwe ko yasutse risansi ku mugandakazi w’umunonitsikazi, Rebecca Cheptegei, agaca amuturira, akamwica na we nyene yitavye Imana imisi mikeyi inyuma ahiye, ariko aturira Cheptegei. Iyo nkuru yatangajwe n’ibitaro Dickson Ndieme yariko avurirwamwo.
Dickson Ndieme, yasandabiye mu bitaro Moi Referral Hospital, mu gisagara ca Eldoret kiri mu burengero bwa Kenya. Yari yahiye ibice 30 kw’ijana vy’umubiri wiwe. Rebecca Cheptegei, wewe yitavye Imana ku musi wa kane w’indwi irangiye. Yari yahiye ibice 80 kw’ijana vy’umubiri wiwe.
Umuvugizi w’ibitaro, Moi Referral Hosptital, Owen Menach, kuri uyu wa kabiri, yemeje inkuru y’uko Dickson Ndieme yitavye Imana. Dickson Ndieme na Rebecca Cheptegei bari basanzwe bakundana. Yamara barashamiraniye ku vyerekeye itongo Cheptegei yaguze muri Kenya.
Cheptegei yarahiganywe mw’isiganwa rya Maraton y’abapfasoni mu nkino mpuzamakungu Olempike ziehruka kubera i Paris mu Bufransa. Yari yarangije mu kibanza ca 44. Abavyeyi biwe batangaje ko umukobwa wabo yari yaguze itongo mu gice citwa Trans Nzoia, kugira abe hafi y’ibibanza bikomeye, abanonotsi bimenyerezamwo muri Kenya. Bitegekanijwe ko Rebecca Cheptegei ashingurwa muri Uganda ku musi wa gatandatu w’iyi ndwi. (AP)
Forum