Nijeriya kuri uyu wa mbere, yashinje abantu 10 icyaha cyo kugambanira igihugu no gucura umugambi wo gushishikariza igisirikare kwigomeka ku butegetsi.
Iki cyemezo kije gikurikira imyigaragambyo yo mu kwezi gushize yabaye mu gihugu hose, aho abantu ibihumbi amagana bihereje imihanda, bamagana ubuzima buhenze.
Abari muri iyo myigaragambyo bahuye n’ingufu z’abashinzwe umutakano babirayemo ndetse bamwe bahasiga ubuzima. Umuryango uharanira uburenganzira bwa muntu Amnesty International, uvuga ko abantu 13 byibuze bishwe. Inzego z'umutekano zahakanye gukoresha ingufu zica.
Aba bagabo 10 bagejejwe imbere y'urukiko rukuru rw’igihugu rwa Abuja, maze bahakana ibyaha. Mu mpapuro z’urukiko, ibiro ntaramakuru by’abongereza, Reuters byabonye, abashinjacyaha ba Leta bavuze ko abigaragambyaga bari bagamije guhungabanya umutekano wa Nijeriya kandi ko "bafatanyije ubugambanyi bugamije ubuhemu."
Abashinjacyaha kandi babashinje gutwika inyubako za Leta no guhungabanya umudendezo rusange. Abunganira abigaragambyaga basabye ko barekurwa batanze ingwate, Leta irabyanga. Urukiko ruzafata icyemezo kw’itariki ya 11 y’uku kwezi kwa cyenda, ubwo biteganijwe ko urubanza rwabo ruzatangira. Bashobora guhanishwa igihano cy'urupfu, baramutse bahamwe n'ibyaha. (Reuters)
Forum