Igisirikare ca Reta Zunze Ubumwe za Amerika carangije igikorwa co gukura inteko zaco mu kibanza ca gisirikare ca nyuma muri Nijeri.
Bibaye umwaka umwe inyuma y’uko abategetsi b’abasirikare bakoze kudeta muri Nijeri basavye igisirikare ca Amerika kuva muri ico gihugu. Ubushikiranganaji bujejwe kwivuna abansi bwa bwa Amerika, mw’itangazo bwasohoreye hamwe n’ubushikiranganji bwo kwivuna abansi bwa Nijeri, bwatangaje ko igikorwa co gukura inteko za Amerika n’ibikoresho vyazo mu kibanza ca gisirikare mu karere ka Agadez caraherahejwe.
Nta vyinshi ubushikiranganji bujejwe kwivuna abansi bwa Amerika bwavuze ku bikoresho vya Amerika vyoba bigikenewe kuvanwa muri Nijeri. Abasirikare ba Amerika 200 bari mu kibanza ca Agadez gikoresha utudege tutagira abadereva twa drone. Ico kibanza kiri mu buraruko bwa Nijeri. Inteko za Amerika zari mu kigoro mpuzamakungu ko kurwanya itagondwa z’abayislamu zikora akatari gake ibitero mu karere ka Sahel.
Yamara abategetsi b’abasirikare bafashe ubutegetsi muri kudeta muri Nijeri mu kwezi kwa gatatu kw’umwaka urangiye babwiye inteko za Amerika n’iz’Ubufaransa kuva muri ico gihugu. (AFP)
Forum