Inama nshingamateka ya Amerika yemeje integuro y’itegeko itegekanya ibihano ku bagize sentare mpuzamakungu mpanavyaha, CPI.
Ibihano bitegekanywa muri iyo nteguro y’itegeko yemejwe ku bwinshi n’abashingamateka b’abarepublikane na kimwe ca gatanu c’abashingamateka b’abademokrate, birimwo kwankira indongozi za CPI kwinjira ku butaka bwa Amerika.
Iyo nteguro y’itegeko ifise amahirwe make yo kwemezwa n’inama nkenguzamateka y’Amerika yiganjemwo abo mu mugambwe w’abademokrate. Prezida w’Amerika, Joe Biden, akomoka muri uwo mugambwe yamaze kuvuga ko atayishigikiye habe namba.
Benshi mu bashingamateka b’abarepublikane barimwo na Mike Johnson atwara inama nshingamateka ya Amerika bavuze ko iyemezwa ry’iyo nteguro y’itegeko, ari ikimenyetso sindamusiga ko Amerika ishigikiye Isirayeri.
Mike Johnson mu majambo yiwe yavuze ko vyerekanye y’uko “Amerika itikozwa ico yise akagwi k’abakozi mpuzamakungu bicara mu biro vyabo, bagasohora imitahe itagira ifatiro yo guhagarika abategetsi ba Isirayeri, ku vyaha batigeze bakora.”
Umushikirizwamanza mukuru wa CPI, Karim Khan, aheruka gusaba ko umushikiranganji wa mbere wa Isirayeri, Benjamin Netanyahu n’indongozi za Hamas basohorerwa imitahe mpuzamakungu yo gutabwa muri yompi. Aba bose bagirizwa ivyaha vy’intambara, CPI yemeza ko bibandanya gukorerwa mu ntara ya Gaza no muri Isirayeri.
Ari nka hamwe abacamanza ba CPI bokwemeza ko iyo mitahe isohoka, hazoba hasigaye ko ibihugu 124 biri muri CPI vyemera guca bishira mu ngiro iyemezwa ry’iyo mitahe. Yaba Amerika, yaba Isirayeri, nta gihugu na kimwe muri ivyo bibiri kiri muri CPI.
Forum