Perezida wa Koreya y’Epfo Yoon Suk Yeol kuri uyu wa kabiri yatangaje imfashanyo nshya n’inkunga yo gushyigikira ishoramari muri Afurika ibarirwa muri za miliyari z’amadolari.
Ubutegetsi bw’i Seoul kuva muri iki cyumweru bwakiriye intumwa ziturutse mu bihugu 48 by’Afurika zitabiriye inama ikomeye. Ni inama Perezida Yoon yabwiye ibiro ntaramakuru by’abafaransa, AFP, ko igamije kugera ku masezerano kuri buri kintu kuva ku mabuye y’agaciro y’ingenzi kugera ku mishinga y’ibikorwa-remezo.
Mu muhango wo gutangiza iyi nama, Perezida Yoon yijeje ko guverinoma ye igiye gukuba kabiri inkunga igenewe iterambere yatangaga kuri Afurika, ikazagera kuri miliyari 10 z’amadolari y’Amerika bitarenze muw’2030.
Uyu mutegetsi yanavuze ko guverinoma ye izatanga miliyari 14 z’amadolari nk’inkunga ku nganda z’abanyakoreya ngo zibashe kwagurira ubucuruzi n’ishoramari ryazo hirya no hino kuri uyu mugabane.
Bwana Yoon yanijeje ko igihugu cye kizafasha cyane mu kugera ku kwihuza kw’ibihugu by’Afurika mu by’ubukungu, binyuze muri gahunda y’isoko rusange ibihugu byo kuri uyu mugabane byatangije muw’2019.
Mbere y’iyi nama, Perezida Yoon yari yabwiye AFP ko “hari imishinga itabarika Koreya y’Epfo n’Afurika bafatanyamo mu rwego rw’ibikorwa-remezo.” Iyo irimo iy’iyubakwa ry’imihanda, ibibuga by’indege n’ibyambu.
Harimo kandi ibikorwa-remezo bijyanye n’ikoranabuhanga rigezweho mu mijyi, ndetse n’ikorwa ry’ibishushanyo-mbonera by’imijyi igezweho.
Mu bategetsi b’ibihugu byo mu karere bitabiriye iyi nama ihuza Afurika na Koreya y’Epfo, harimo ba Perezida Paul Kagame w’u Rwanda, William Ruto wa Kenya na Samia Suluhu Hassan wa Tanzaniya.
Perezida Kagame, mu ijambo yagejeje ku bayitabiriye, yavuze ko iyi nama yerekana ko hari byinshi Afurika na Koreya y’Epfo bafatanyamo kandi bikungukira buri ruhande.
Ubwumvikane bw’ishingwa ry’akarere k’isoko rusange k’Afurika bufatwa nk’amasezerano y’ubuhahirane yagutse kurusha andi ku isi yose mu bijyanye n’umubare w’abaturage ahurije hamwe.
Ibihugu 54 kuri 55 by’Afurika, byemeye gushyira umukono ku masezerano ashyiraho isoko rusange ry’uyu mugabane, uvanyemo igihugu cya Eritereya gusa.
Perezida Yoon wa Koreya y’Epfo, mu nama n’abategetsi b’Afurika, yanijeje “kwihutisha amasezerano mu byiciro binyuranye by’ubufatanye mu bucuruzi n’uyu mugabane.”
Mu gihe Koreya y’Epfo ishishikariye kwagura ubufatanye bwayo n’ibihugu by’Afurika mu bijyanye n’ingufu n’ibikorwa-remezo, umukuru w’iki gihugu yavuze ko bitaye cyane no ku ngaruka z’imihindagurikire y’ibihe kuri uyu mugabane.
Aha yagarutse ku mishinga nk’urugomero rwa Olkaria muri Kenya rubyaza amashanyarazi ubushyuhe karemano bwo mu nda y’isi, ndetse n’uruganda rutunganya uburyo bwo kubika ingufu z’amashanyarazi hakoreshejwe za batiri ruri muri Afurika y’Epfo.
Bwana Yoon akizeza ko igihugu cye kizakomeza kwagura imishinga ifasha mu guhangana n’ibibazo biterwa n’imihindagurikire y’ibihe mu bihugu by’Afurika.
Forum