Uko wahagera

Irelande, Noruveje na Esipanye Byemeye Leta Yigenga ya Palestina


Umwana wazamuye ibendera rya Palestina i Barcelona muri Esipanye
Umwana wazamuye ibendera rya Palestina i Barcelona muri Esipanye

Ibihugu bya Irelande, Noruveje na Esipanye kuri uyu wa gatatu byatangaje ko byemera leta yigenga ya Palestina bivuga ko iyemezwa rya leta ebyiri zitandukanye ari cyo cyatanga amahoro arambye muri aka gace kokamwe n’intambara hagati ya Isirayeli na Hamasi.

Ministri w’Intebe wa Noruveje, Jonas Gahr Støre, yavuze ko intambara ikomeje mu karere ka Gaza yagaragaje ku buryo budasibirwaho ko kugera ku mahoro n’umutekano bigomba gushingira ku gushakira igisubizo ikibazo cya Palesitina.

Noruveje ibona ko muri rusange ishyirwaho rya leta ebyiri zitandukanye muri kariya karere ari ingingo amahanga yemera ko yarangiza ikibazo cy’intambara z’urudaca zihahora. Yerekanye ko muri uku kwezi, kuba inteko rusange y’Umuryango w’Abibumbye yaremeje ko Palestina yaba umunyamuryango wa ONU bibigaragaza.

Ministri w’intebe wa Esipanye, Pedro Sánchez, we yavuze ko icyo cyemezo gishingiye ku mahoro, ubutabera no kutajarajara. Yavuze ko igihe kigeze kuva mu magambo hakajyaho ibikorwa.

Ibyo bihugu uko ari bitatu byavuze ko kuva tariki ya 28 ukwezi kwa gatanu uyu mwaka, bizatangira kubahiria icyo cyemezo cyo gufata Palesitina nka leta yigenga.

Umunyanama wa Perezida Biden mu byerekeye umutekano w’igihugu yavuze ko Perezida Biden yemera inzira y’uko hajyaho leta ebyiri zitandukanye kandi ko ariko yabyemeraga kuva kera ariko ashimangira ko yemera ko leta ya Palestina yashyirwaho habayeho ibiganiro hagati y’impande zombi bireba kuruta uko byakwemezwa n’amahanga.

Ministeri w’ububanyi n’amahanga wa Isirayeli, Israel Katz, yahise ahamagaza ba ambasederi bayo muri ibyo bihugu uko ari bitatu. Yavuze ko amateka azibuka Esipanye Noruveje na Irelande nk’ibihugu byahisemo guha abicanyi n’abafata ku ngufu bo mu mutwe wa Hamasi umudari wa zahabu.

Forum

XS
SM
MD
LG