Uko wahagera

Umushinjacyaha wa CPI Asaba ko Abategetsi ba Isirayeri n'Indongozi za Hamas Basohorerwa Imitahe


Kuri uyu wa mbere umushinjacyaha w’urukiko mpuzamahanga mpanabyaha yasabiye abategetsi bakuru ba Isiraheli barimo na Minisitiri w’intebe Benjamin Netanyahu inyandiko zo kubata muri yombi.

Abo bombi umushinjacyaha Karim Khan arabashinja ibyaha byo mu ntambara n’ibyibasiye inyokomuntu. Uyu mushinjacyaha kandi yanasabiye inyandiko nk’izo abategetsi batatu bakuru b’umutwe wa Hamas.

Mu itangazo yasohoye, umushinjacyaha Karim Asad Ahmad Khan, akikijwe n’abashinjacyaha bagenzi be babiri, yavuze ko yashyikirije urugereko rwa mbere ntegurarubanza ku bibera muri Palestina, ubusabe bwa manda zo guta muri yombi abategetsi b’izo mpande zombi zihanganye.

Ibyaha aba bakurikiranyweho, bifatiye ku ntambara irimo kuba muri Gaza kuva mu kwa 10 k’umwaka ushize, hagati y’ingabo za Isiraheli n’umutwe wa Hamas.

Ku bategetsi ba Isiraheli, umushinjacyaha Khan yagize ati: “Nanakwemeza kandi ko, uyu munsi, nshingiye ku bimenyetso byakusanyijwe bikanasuzumwa n’ibiro byanjye, mfite impamvu zifatika zo kwemera ko, Minisitiri w’intebe wa Isiraheli Benjamin Netanyahu na Minisitiri w’ingabo w’icyo gihugu Yoav Gallant bagize uruhare mu byaha mpuzamahanga bikurikira, byakorewe ku butaka bwa Palestina, guhera nibura kuya 8 y’ukwa Cumi 2023.”

Ibyo byaha umushinjacyaha yavuze ko abategetsi ba Isiraheli bakurikiranweho harimo, kwicisha abasivili inzara bikozwe nk’intwaro y’intambara. Ubwicanyi nk’icyaha cy’intambara, kugaba nkana ibitero ku basivili nk’icyaha cy’intambara.

Harimo kandi kurimbura imbaga nk’icyaha cyibasira inyoko-muntu. Hakazamo itoteza n’ibindi bikorwa bitari ibya kimuntu, nk’ibyaha byibasira inyoko-muntu.

Mu bindi byaha, umushinjacyaha Khan yavuze ko akurikiranyeho Benjamin Netanyahu na Minisitiri Yoav Gallant, harimo guteza ku bwende umubabaro ndengakamere ku mubiri w’umuntu, cyangwa se kumukomeretsa bikabije.

Umushinjacyaha Karim Khan yavuze ko mu bimenyetso ibiro bye byakusanyije kuri ibi byaha, harimo ibiganiro byagiranye n’abarokotse ibi byaha ndetse n’ababyiboneye bikorwa. Hari kandi amashuso y’umwimerere, amafoto n’amajwi. Hakabamo

amashusho yafashwe n’ibyogajuru – satelite, ndetse n’inyandiko-mvugo z’itsinda rya bamwe mu bakekwaho kubigiramo uruhare.

Ibyo, umushinjacyaha Khan akavuga ko birimo ibigaragaza uko Isiraheli, mu buryo bugenderewe kandi bwitondewe yakumiriye abaturage bo mu bice byose bya Gaza kugerwaho n’iby’ibanze umuntu akenera ngo abeho.

Ku mutwe wa Hamas, abategetsi bawo umushinjacyaha Karim Khan asabira gutabwa muri yombi, ni Yahya Sinwar, umukuru w’uwo mutwe, Mohammed Diab Ibrahim Al-Masri, umukuru w’ishami rya gisirikare rya Hamas, na Ismail Haniyeh, umukuru w’ishami rya politiki ry’uyu mutwe.

Kuri aba, umushinjacyaha Khan yagize ati: “Ibiro byanjye biremeza ko, hari impamvu zifatika zo kwemera ko aba bayobozi batatu ba Hamas bagize uruhare mu byaha byo kwica abasivili b’abanya Isiraheli mu gitero cyagabwe na Hamas, n’indi mitwe yitwaje intwaro ku itariki ya karindwi y’ukwa Cumi muw’2023; gutwara abantu bunyago, hamwe n’ibindi byaha bikubiye mu busabe bwacu.”

Ku rutonde rw’ibyaha aba bategetsi ba Hamas bo bakurikiranyweho, hazamo kandi kurimbura imbaga nk’icyaha cyibasira inyoko-muntu. Hakabamo ubwicanyi nk’icyaha cyibasira inyoko-muntu kikaba n’icyo mu ntambara. Hari kandi gusambanya ku gahato n’irindi hohotera rishingiye ku gitsina nk’ibyaha byibasira inyokomuntu, bikaba n’ibyo mu ntambara. Hazamo kandi iyicarubozo nk’icyaha cyo mu ntambara icya rimwe n’ikibasira inyokomuntu.

Ku ruhande rwa Isiraheli, ubutegetsi bwamaganiye kure ibyakozwe n’umushinjacyaha Karim Khan, ibyo yise “igitero gikomeye kandi cyeruye” kigabwe ku bagizweho ingaruka n’igitero cya Hamas cyo kuya karindwi y’ukwa Cumi no ku bantu 128 bajyanywe bunyago n’uwo mutwe.

Mu itangazo yashyize ahagaragara, Bwana Israel Katz minisitiri w’ububanyi n’amahanga wa Isiraheli yagize ati: “Mu gihe abicanyi n’abasambanya ku gahato ba Hamas bakorera abavandimwe bacu ibyaha byibasiye inyokomuntu, umushinjacyaha yashyize Minisitiri w’intebe na Minisitiri w’ingabo ba Isiraheli mu gatebo kamwe n’ibikoko bibi bisa nk’abanazi bya Hamas – urukozasoni ruzahora rwibukwa mu mateka. Nategetse ko hashyirwaho bidatinze ikigo kidasanzwe muri minisiteri y’ububanyi, kirimo inzego zose za kinyamwuga, kugira ngo harwanywe icyo cyemezo kigamije mbere na mbere kuboha Isiraheli amaboko no kuyibuza gukoresha uburenganzira bwayo bwo kwirwanaho.”

Uyu mutegetsi yongeyeho ko agiye kuvugana n’abaminisitiri b’ububanyi n’amahanga b’ibihugu bikomeye hirya no hino ku isi akabakangurira kwigomeka kuri icyo cyemezo, ndetse bagatangaza ko, kabone n’ubwo izo manda zasohorwa, batazazishyira mu bikorwa ku bategetsi ba Isiraheli. Ati:“Nta ngufu na nkeya ku isi zizatubuza kugaruza abatwawe bunyago bose no guhirika ubutegetsi bw’iterabwoba bwa Hamas.”

Leta Zunze Ubumwe z’Amerika na yo yamaganye ibyakozwe n’umushinjacyaha w’urukiko mpuzamahanga mpanabyaha. Minisitiri w’ububanyi n’amahanga w’iki gihugu, Antony Blinken mu itangazo yasohoye, yagize ati: “Twamaganye ibyakozwe n’umushinjyacyaha byo kugereranya Isiraheli n’umutwe wa Hamas. Biteye isoni. Hamas ni umutwe w’iterabwoba wakoreye abayahudi ubwicanyi ndengakamere nyuma ya Jenoside yabakorewe, kandi uracyafashe bunyago inzirakarengane z’abaturage, barimo n’abanyamerika.”

Forum

XS
SM
MD
LG