Melinda French Gates, umunyamatungo w'umugiraneza wo muri Reta Zunze Ubumwe za Amerika, ejo ku musi wa mbere, yatangaje ko avuye mw'ishirahamwe ridakorera inyungu, Gates Foundation.
Yari yashinze iryo shirahamwe hamwe n'uwahoze ari umugabo wiwe, Bill Gates. Gates Foundation ryabaye rimwe mu mashirahamwe y'abagiraneza afise uruhara rukomeye cane mu makungu.
Ivyatangajwe na Belinda French Gates, afise imyaka 59, bibaye imyaka itatu inyuma yuko yahukanye n’uwahoze ari umugabo wiwe, Bill Gates, afise imyaka 68. Hisunzwe amasezerano hagati y’abo bantu bahoze bubakanye, Belinda French Gates, ingingo yiwe yo kuva mw’ishirahamwe Gates Foundation izoja mu ngiro kw’italiki 7 y’ukwezi kwa gatandatu, azoronka imiliyaridi 12 n’imiliyoni 500 y’amadolari yo gukoresha mu bikorwa vyiwe vy’ubugiraneza, bifasha abapfasoni n’imiryango.
Belinda French Gates, yatangaje ko inyuma y’uko yiyumviye neza, yafashe ingingo yo gutanga imihoho mu mabanga yiwe y’icegera c’umuyobozi w’ishirahamwe, Bill and Melinda Foundation.
Ni mu butumwa bwanditse yashize ku mbuga ngurukanabumenyi. Yavuze ko iki ari igihe gihambaye ku bapfasoni n’abigeme muri Reta Zunze Ubumwe za Amerika no mu makungu, hamwe n’abo bose bari mu rugamba rwo gukingira n’ugushira imbere uburinganire. Yavuze ko abo bantu bakeneye gufatwa mu mugongo mu buryo bwihutirwa.
Ingingo Belinda French Gates yatangaje yo kuva mw’ishirahamwe, Gates Foundation, ayifashe mu mwaka w’amatora muri Reta Zunze Ubumwe za Amerika aho vyitezwe ko ikibazo co gukoroza inda kigira uruhara rukomeye cane mu matora azoba mu kwezi kw’icumi na rimwe kw’uyu mwaka.
Abademokrate bariko barondera gufatira kw’ishavu ababashigikiye bafitiye abarepublikani ku twigoro twabo two kugeramira uburenganzira bw’abapfasoni n’abigeme bwo gukoroza inda. Melinda French Gates amaze igihe kirekire afitaniye imigenderanire myiza n’abanyapolitike bakomeye bo mu mugambwe w’abademokrate.
Bill Gates yarongoye Melinda French mu mwaka w’i 1994. Bafitaniye abana batatu. Bahukanye mu mwaka w’i 2021. Yamara bari babandanije bayoborera hamwe ishirahamwe, Gates Foundation, bakoresheje amatungo menshi baronse biciye mw’ishirahamwe, Microsoft.
Bill Gates, ku musi wa mbere, yarashimiye uwahoze ari umutambukanyi wiwe ku ntererano ikomeye yatanze mw’ishirahamwe, Gates Foundation.
Forum