Abategetsi b'abasirikare bayoboye ibihugu vya Mali, Nijeri na Burkina Faso bumvikanye ku mugambi wo gushiraho inteko rusangi zizoba zijejwe kurwanya ubwicanyi n'uruhagarara biterwa n'intagondwa z'abayislamu mu bihugu vyabo biri mu karere ka Sahel.
Umutegetsi mukuru w’igisirikare ca Nijeri, Brigadiye Jenerali Moussa Salou Barmou, yabitangaje inyuma y’inama na bagenziwe b’ibihugu vya Mali na Burkina Faso, ku musi wa gatatu. Yavuze ko inteko z’ibihugu vyabo ziri hamwe zigiye gutangura ibikorwa vyazo vya gisirikare mu buryo bwihuta bushoboka kugira zubahirize umutekano mu karere birimwo.
Abahinga mu vyerekeye ibibazo biri muri ako karere batangaje iyo nkuru kuri uyu wa kane. Yamara batangaje ko bafise amazinda ku vyerekeye niba izo nteko zizoshika ku migambi yazo.
Ivyatangajwe n’abasirikare bakuru b’ibihugu vya Nijeri, Mali, na Burkina Faso, ni zimwe mu ngingo zitari nke ivyo bihugu 3 vyafashe mu ntumbero yo kwirwanako mu rugamba rwo kurwanya intagondwa z’abayislamu. Baramaze kugira urunani ku bijanye n’umutekano. Hari inyuma y’uko bihagaritse imigenderanire mu vya gisirikare n’ibihugu bibanyi hamwe n’ivyo ku mugabane w’Ubulaya. Bifatanije n’Uburusiya busanzwe mu bice vy’akarere ka Sahel. (AP)
Forum