Prezida wa Ghana, Nana Akufo-Addo, yabaye ararindira gushira umukono ku nteguro y’itegeko rihana abakundana n’abo bahuje ibitsina.
Nana Akufo-Addo yatangaje ko arindiriye ko sentare ntahinyuzwa yemeza ko iyo nteguro yitegeko yubahiriza ibwirizwa nshingiro.
Mu ndwi iheze, ni ho abashingamateka bemeza iyo nteguro y’itegeko riteje impari muri Ghana.
Muri Ghana, ubutinganyi busanzwe butemewe n’amategeko. Uwufatanywe ivyemezo vy’uko ari mu bakundana n’abo basangiye ibitsina, ahanishwa igihano c’umunyororo ugera ku myaka itatu.
Integuro nshasha y’itegeko ritariko rivugwako rumwe, itegekanya igihano c’umuyororo w’imyaka cumi, ku mutinganyi wese yerekanye ku mugaragaro ko akundana n’uwufise igitsina gishusha nk’iciwe, uwukora ibikorwa bitera intege abari muri uwo murwi, n’uwutanga imfashanyo zo kubafasha.
Abiyamirije iyo nteguro y’itegeko, barimwo abavuga ko ryoba rije gusubiza inyuma agateka ka zina muntu, n’abatinya ko Ibanki Nkuru y’Isi ishobora guca ihagarika imfashanyo iha Ghana.
Itororokanirizo ry’amakuru y’Abongereza, Reuters, ryemeza ko umushikiranganji ajejwe ikigega ca Reta muri Ghana ari we yaburiye Prezida Nana Akufo-Addo, ko iri tegeko rikemezwa, Ghana ishobora gutakaza imiriyaridi 3 n’amamiriyoni 8 z'amadolari y'Amerika y'imfashanyo ya Banki y'Isi.
Urwandiko Reuters yemeza ko ifise, rurimwo kandi imburi z’uko n’Ikigega Mpuzamakungu c'Amafranga, FMI, naco gishobora guhagarika imigambi yaco itandukanye kuri Ghana. Bigenze uko, nkuko urwo rwandiko rubandanya kubivuga, Ghana yoja mu bibazo bikomeye vy’ubutunzi.
Ibanki y’Isi ntaco iravuga kuri iyi nteguro y’itegeko. Gusa, yaratomoye ko yabaye irahagarika imfashanyo kuri Uganda kubera itegeko rihasha abatinganyi iherutse kwemeza.
Ikigega FMI naco cavuze ko ataco covuga ku nteguro y’itegeko ritaremezwa.
Mu kurindira ko sentare nkuru ya Ghana itomora niba iyo nteguro y’itegeko ataho igonganira n’ibwirizwa nshingiro, impande zitandukanye zirimwo amashirahamwe n’ibihugu zamaze gushira ahabona impungenge zazo. Amerika yavuze ko itewe impungenege n’iyo nteguro y’itegeko, ica isaba Ghana kutayemeza. (REUTERS)
Forum