Ubutegetsi bwa gisirikari muri Gineya bwakuyeho inzitizi zose ku mbuga za interineti zari zarashizweho mu mezi atatu ashize. Bibaye nyuma yuko amasendika y'abakozi atangaje ko ateganya gutangiza imyigaragambyo mu gihugu hose guhera kuwa mbere utaha.
Iyo myigaragambyo izaba igamije gusaba irekurwa ry’umunyamakuru Sekou Jamal Pendessa, ukuriye sendika y’abanyamakuru, igabanuka ry’ibiciro by’ibiribwa ku masoko no gukuraho inzitizi kuri interineti. Iyi myigaragambyo igiye kuba mu gihe gihugu havugwa ibibazo byinshi bishingiye ku kuba guverinoma yarasheshwe ntisimburwe.
Byari biteganijwe ko kuri uyu wa gatanu ari bwo urukiko ruri bufate umwanzuro ku rubanza rw’umunyamakuru Pendessa. Ubushinjacyaha bwamusabiye gufungwa amezi atandatu.
Ubuyobozi bwa gisirikali bukuriwe na Jenerali Doumbouya bwafashe ubutegetsi mu 2021 binyuje muri kudeta. Buvuga ko icyemezo cyo kugabanya ikoreshwa rya interineti cyafashwe kubera impamvu z’umutekano w’igihugu.
Kuri uyu wa mbere ushize, Jenerali Mamady Doumbouya, yatangaje ko asheshe guverinoma ndetse anategeka igihugu gufunga imipaka yacyo.Yanategetse ko abagize guverinema bamburwa pasiporo zabo, imodoka z’akazi na konte zabo mu ma banki zigafatirwa.
Kuva Doumbouya ageze ku butegetsi nta myigaragambyo myinshi iba mu gihugu. Muri 2022, abategetsi ba gisirikali babujije imyigaragambyo mu gihugu.Ababigerageje barimo abanyamakuru, abo muri sosiyete sivili n’abo mu mashyaka atavuga rumwe n’ubutegetsi, batawe muri yombi.
Kubera igitutu cy’amahanga ubuyobozi bwa gisirikari buheretse gutangaza ko buteganya gusubiza ubutegetsi mu maboko y’abasivili mu mpera z’uyu mwaka. (AFP)
Forum