Sendika z’abakozi muri Gineya zahamagaje imyigaragambyo rusange mu gihugu hose, guhera kuwa mbere w’icyumweru gitaha.
Iyo myigaragambyo izaba igamije gusaba irekurwa ry’umunyamuryango waryo w’umunyamakuru, igabanuka ry’ibiciro by’ibiribwa ku masoko no gukuraho inzitizi kuri interineti. Iyi myigaragambyo igiye kuba mu gihugu havugwa ibibazo byinshi bishingiye kuba guverinoma yarasheshwe ntisimburwe.
Kuri uyu wa mbere ushize, Perezida wa Gineya, Jenerali Mamady Doumbouya, yatangaje ko asheshe guverinoma ndetse anategeka igihugu gufunga imipaka yacyo.
Jenerali Doumbouya yafashe ubutegetsi mu 2021 binyuze muri kudeta. Uyu mutegetsi n’agatsiko k’abasirikare bakorana bategetse ko abagize guverinema bamburwa pasiporo zabo, imodoka z’akazi na konte zabo mu ma banki zigafatirwa.
Imyigaragambyo nk’iyo yatumijwe muri Gineya, yaherukaga mu 2007 ku butegetsi bwa Prezida Lansana Conte. Icyo gihe yaguyemo abantu 186, nk’uko bivugwa n’imiryango itegamiye kuri leta.
Kuva Doumbouya ageze ku butegetsi nta myigaragambyo myinshi iba mu gihugu. Muri 2022, abategetsi ba gisirikali babujije imyigaragambyo mu gihugu.
Ababigerageje barimo abanyamakuru, abo muri sosiyete sivili n’abo mu mashyaka atavuga rumwe n’ubutegetsi, batawe muri yombi.
Kubera igitutu cy’amahanga ubuyobozi bwa gisirikari buheretse gutangaza ko buteganya gusubiza ubutegetsi mu maboko y’abasivili mu mpera z’uyu mwaka.
Forum