Uko wahagera

Ubushinwa n'Amerika Birahiganwa mu Ikoranabuhanga Ryerekeye Ibinyabuzima


Abanyamategeko bo muri Amerika bahangayikishijwe n’icyo babona nko kunanirwa kw’Amerika mu nzira yo guhiganwa n’Ubushinwa mu ikoranabuhanga rishingiye ku binyabuzima no kubibungabunga

Baravuga ko hashobora kuvuka akaga ku mutekano w’igihugu n’inyungu zacyo z’ubucuruzi. Ariko uko ihiganwa ry’ibihugu mu byerekeye ikoranabuhanga rishingiye ku binyabuzima no kubibungabunga rikomeza gufata intera ndende, hari abavuga ko kuba Amerika ikomeza gukumira ibigo by’Ubushinwa birikora bishobora kuyigiraho ingaruka mbi.

Iri koranabuhanga ritanga icyizere ku buzima bwa buri munsi. Abashakashatsi barikoresha mu iterambere ryo kuvumbura imiti, bateza imbere ubuhinzi n’ubworozi.

Kubera ingufu ubu bushakashatsi bufite ku buzima bwa muntu, guverinoma z’Amerika n’Ubushinwa zibwitayeho ku rugero rwo hejuru.

Mu nteko ishinga amategeko y’Amerika no muri Sena, abanyamategeko bakoze imishinga y’amategeko agamije gukumira ibigo byo hanze bikora ubu bushakashatsi bifatwa nk’ibishobora guteza ikibazo. Ibyo bigo bibujijwe gukorana n’abavuzi bakoresha ingengo y’imali ya leta y’Amerika. Iyo mishanga y’amategeko ivuga ibigo bine by’Ubushinwa.

Ambasade y’Ubushinwa yavuze ko abashyigikiye iyo mishinga y’amategeko bafite imitekerereze ibogamye kandi bashaka gupyinagaza ibigo by’Ubushinwa bitwaje impamvu z’ibinyoma. Yasabye ko ibigo by’Ubushinwa byakomorerwa kandi bigafatwa kimwe n’ibindi nta vangura.

Impaka kuri iri koranabuhanga zibaye mu gihe ubutegetsi bwa Perezida Biden bugerageza gusubiza mu buryo umubano w’Amerika n’Ubushinwa wari warahungabanyijwe n’impamvu zinyuranye zirimo intambara y’ubucuruzi, umutekano mu byerekeye ikoranabuhanga rya interineti, icyorezo cya Covid 19 no kugwiza ingabo mu nyanja y’amajyepfo y’Ubushinwa,

Abanenga iyi mishinga y’amategeko baravuga ko gukumira ibigo by’Ubushinwa bishobora gukoma mu nkokora iterambere ryazanira rubanda ibyiza.

Forum

XS
SM
MD
LG