Afurika y'Epfo yemeje urupfu rw'abasirikare bayo babiri baguye ku rugamba muri Republika ya Demokarasi ya Kongo. Bahitanywe n'urusasu rwa bombe rwanakomerekeje abasirikare b'ico gihugu batatu.
Igisirikare ca Afurika y’Epfo, SANDF, kibicishije mw’itangazo ryanditse, cavuze ko abo basirikare ari bo ba mbere baguye ku rugamba kuva Afurika y’Epfo yatangura kurungika abasirikare bayo 2.900 muri ico gihugu mu kwezi kwa cumi na kabiri ko mu mwaka uheze.
Yabarungitse gufasha ingabo za Kongo gutuza umurwi wa M23 mu buseruko bw’ico gihugu, biciye mw’ishirahamwe ry’ibihugu vyo muri Afurika yo mu bumanuko, SADC.
Itangazo rya Afurika y'Epfo rigira riti: “Urusasu rwa bombe rwaguye ku birindiro birimwo abasirikare bacu. Batatu bakomeretse cane bariko bavurirwa mu bitaro vyegereye I Goma. Nta makuru akwiye turaronka ku vy’ico gitero. Turacatohoza”.
Mu gihe impande zitandukanye zari zaranse ko Afurika y’Epfo irungika abasirikare bayo muri Kongo, Prezida wa Afurika y’epfo, Cyril Ramaphosa, uno munsi ku wa kane agaruka ku ngabo zaguye muri Kongo, yabwiye abagize inama nshingamateka y’igihugu ciwe ko Afurika y’Epfo nk’umunyamamuryango wa SADC yabwirizwa kurungika izo ngabo..
Yagize ati: “Mu ngwano zose, hari abazirwamwo. Turunamiye abaguye ku rugamba, n’abarukomerekeyemwo. Abasirikare bacu baguye ku rugamba ni intwari kuko bariko baharanira ko Afurika ibamwo umutekano.”
Umugambwe, Democratic Alliance, DA, uza imbere mu yitavuga rumwe n’ubutegetsi bwa Afurika y’Epfo, wavuze ko reta, prezida wa Afurika y'Epfo n’ubushikiranganji bwemeje umugambi wo kurungika abasirikare muri Kongo, bari bakwiye kubazwa ingaruka zose. Umwe mu bayobozi b'uwo mugambwe, Kobus Marais, yagize ati: “Nta ngaruka zifatika ingwano ya Kongo, igira ku mutekano w’igihugu cacu.”
Forum