Urwo rugomo rwabaye hagati y’aborozi bo muri Leta ebyiri zituranye, bwahitanye abantu byibura 39, abayobozi baravuga ko bwatewe n’amakimbiranye aturuka ku masambu.
Muri iki cyumweru gishize, abantu barenga 50 barimo abagore n’abana n’abasirikare babiri ba ONU biciwe hafi y’umupaka wa Sudani y’epfo na Sudani, ubwo abaturage bo mu karere kamwe bateraga abo mu kandi papfa imbibi.
Mu bushyamirane buheruka, habaye imirwano hagati y’aborozi bo muri Leta ya Lakes n’iya Warrap, kuri uyu wa gatatu yakomeje igeza ku munsi wa kane.
Kuva ibonye ubwigenge mu mwaka wa 2011, Sudani y’epfo nta mahoro yigeze igira.
Urugomo rwarakomeje muri utwo turere aho abaturage barwanira inzuri zo kuragiramo inka zabo, amazi, imirima n’indi mitungo kamere.
Muri Leta ya Lakes, abantu 20 barishwe, abandi 36 barakomereka, nk’uko Majoro Elijah Mabor Makuach, umuvugizi wa polisi muri iyo Leta, yabivuze.
Muri Leta bituranye ya Warrap abantu 19 barishwe, 17 barakomereka. Byavuzwe na William Wol, minisitiri ushinzwe itangazamakuru muri iyo Leta.
Wol yavuze ko buri mwaka, haba ubushyamirane hagati y’aba Pakam bo muri Leta ya Lakes n’aba Luanygang bo muri Leta ya Warrap. Avuga ko ibyo ari karande ituruka ku makimbirane y’ubutaka kandi ko bikunze kuboneka mu gihe ubwatsi bwumye.
Makuach yavuze ko abashinzwe umutekano bo muri Leta ya Lakes, boherejwe ahabereye ubushyamirane kandi ko babashije guhagarika urwo rugomo. (Reuters)
Forum