Uko wahagera

Opozisiyo Muri Tanzaniya Yakoresheje Imyigaragambyo Isaba Kuvugurura Itegeko Nshinga


Imyigaragambyo muri Tanzaniya
Imyigaragambyo muri Tanzaniya

Ishyaka ritavuga rumwe n’ubutegetsi bwa Tanzaniya, CHADEMA ryakoze imyigaragambyo yaryo ya mbere ikomeye mu myaka myinshi, kuri uyu wa gatatu. Rirasaba amavugurura kw’itegeko nshinga, kugirango ububasha bwa perezida bugabanuke.

Perezida Samia Suluhu Hassan, mu mwaka ushize yari yakuyeho icyemezo John Magufuri yasimbuye yari yafashe mu mwaka wa 2016, cyacaga mitingi za politiki. Yanoroheje izindi nzitizi ku itangazamakuru no ku mashyaka atavuga rumwe n’ubutegetsi.

Cyakora Hassan, mu mwaka ushize yanenzwe n’impirimbany z’uburenganzira bwa muntu, nyuma y’uko abantu benshi batawe muri yombi, kubera ko bateguye imyigaragambyo yamaganaga amasezerano ajyanye n’ikoreshwa ry’icyambu.

Imyigaragambyo yo kuri uyu wa gatatu, mu murwa mukuru w’ubucuruzi, Dar es Salaam, yatumijwe n’ishyaka ritavuga rumwe n’ubutegetsi, Democracy and Progress, rizwi nka CHADEMA.

CHADEMA ivuga ko bidashoboka kugira amatora yisanzuye kandi atabogamye mu mwaka utaha, hakurikijwe itegeko nshinga igihugu kigenderaho ubu, ryemejwe mu mwaka wa 1977 ubwo Tanzaniya yayoborwaga n’ishyaka rimwe rukumbi. Abigaragambya banasabye abayobozi kworoshya ubuzima buhenze.

Abantu ibihumbi n’ibihumi bashyigikiye CHADEMA, bakoze ingendo I Dar es Salaam hose, bazunguza ibitambaro, kandi bavuga amagambo ahamagarira ishyirwaho rya komisiyo y’amatora yigenga n’amavugurura kw’itegeko nshinga.

Abofisiye mu gipolisi bari baherekeje abakoraga izo ngendo.

Ananilea Nkya, impirimbanyi y’uburenganzira bwa muntu akaba n’umwe mu bari mu myigaragambyo, yabwiye ibiro ntaramakuru byo mu Bwongereza, Reuters, ati: “Ndi hano gushaka uburyo haboneka itegeko nshinga rishya n’amategeko mashya agenga itora, yatuma abayobozi babazwa ibyo bakoze”.

Byitezwe ko Hassan Sululu aziyamamariza indi manda mu matora yo mu mwaka utaha.

Forum

XS
SM
MD
LG