Ubucamanza bwo mu gisagara ca New York aha muri Amerika bwategetse Donald Trump yahoze ari prezida w’Amerika kuriha amafaranga yababa ibihumbi 400 vy’amadorali y’Amerika, ikimenyeshamakuru, The New York Times n’abamenyeshamakuru baco 3 bakora inkuru z’amatohoza.
Ni amafaranga ikimenyeshamakuru, The New York Times, n’abamenyeshamakuru 3 bakoresheje mu kuburana na Trump muri dosiye yabitwariye abagiriza kumurengera akarimbi mu nkuru y’amatohoza ku vy’ubutunzi bw’umuryango wiwe n’amanyanga mu vy’amakori n’amatagisi.
Ikimenyeshamakuru Nyamerika The New York Times, n’abamenyeshamakuru batatu ari bo Susanne Craig, David Barstow na Russell Buettner batsinze urwo rubanza rwabahuza na Trump mu kwa gatanu k’umwaka uheze.
Danielle Rhoads avugira ikimenyeshamakuru The New York Times, yavuze ko ingingo y’ubutungane bwa New York ari ubutumwa bukomeye ku bibaza ko bashobora kuzivya abamenyeshamakuru biciye mu kwifatira ubutungane.
Ino dosiye, irimwo kandi umwishwa wa Trump yitwa Mary Trump, yagirizwa kuba yararenze ku masezerano yamubaza kugira ico avuze ku vy’ubutunzi n’amakori y’umuryango, agaha amakuru The New York Times n’abamenyeshamakuru batatu.
Hagati aho, Umucamanza Robert Reed yanse ubusabe bwa Mary Trump ko urubanza yisigaranyemwo ruba rurahagaze mu kurindira ko hasohoka ingingo, y’ivyavuye mu busabe bwiwe bw’uko ubutungane bwotegeka Trump kutabandanya amwitwarira.
Ababuranira Mary Trump banse kugira ico batangaza inyuma y’ino ngingo. Ku ru hande rwa Trump, Alina Habba amuburanira yavuze ko bababajwe n’uko The New York Times n’abamenyeshamakuru batatu bavanywe muri uru rubanza.
Habba ariko yashimye cane ko umwishwa wa Trump we akiri mu mburano. Yagize ati: “ Ibi, bitweretse ko ivyo twagiriza Mary bifadika. Turindiranye igishika gutangura kuburana.”
Mu 2021 Trump acuguruza urubanza, yari yavuze ko Ikimenyeshamakuru The New York Times, n’abamenyeshamakuru baco 3 barondeye vyanke bikunde umwishwa wiwe Mary kugira bamuvaneko amakuru y’ibanga mu vy’amakori y’abo kwa Trump. Ico gihe, Trump yemeza ko Times n’abamenyeshamakuru bayo barondera Mary Trump babizi neza ko hari amasezerano yamubuza kugira ico avuze ku vy’ayo makori n’amatagisi.
Mary Trump ntahakana ko yatanze ayo makuru. Mu gitabo yanditse mu 2020, aremanga ko ari we soko rikuru ry’amakuru yose New York Times yanditse, yerekana ingene Trump na se bakoze amanyanga mu ma tagisi igihe kirekire.
Mary Trump w’imyaka 58, ni umukobwa wa mwene wabo na Trump yitwa Fred Trump, yitavye Imana mu 1981 afise imyaka 42. Mary akunze kumvikana akatari gake anebagura Inarume Donald Trump, mu kumwita “umunyamafuti wo ku rwego rwo hejuru”
Mu 2018, Inkuru y’amatohoza ya The New York Times ku vy’ubutunzi n’amakori y’umurynago wa ba Trump, yatahukanye agashimwe kitwa Pulitzer Prize gahabwa abamenyeshamakuru baba bakoze inkuru idasanzwe. (AP)
Forum