Muri Leta zunze ubumwe z'Amerika, urukiko rwakatiye igifungo cy'amezi 50 Umunyamerika witwa Charles McGonigal, wari umuyobozi muri FBI. Yahamwe n'ibyaha byo gukorana n'umuherwe w'inkoramutina ya perezida w'Uburusiya Vladimir Putin.
Charles McGonigal, w’imyaka 55 y’amavuko, yahoze akuriye urwego rwo gukumira ubutasi bw’amahanga mu biro bya FBI mu mujyi wa New York, mu burasirazuba bw’igihugu, kugera mu 2018.
Mu byo yakoze, yayoboye anketi ku Murusiya w’umuherwe witwa Oleg Deripaska, uri ku rutonde rw’abo Amerika yafatiye ibihano kubera uruhare ibarega mu ntambara yo muri Ukraine. Amerika ivuga ko Deripaska ari umwe mu nkoramutima cyane zikorera Perezida Putin. Amaze gusezera mu kazi ka leta, McGonigal yagiye kumukorera.
Charles McGonigal yatawe muri yombi mu kwezi kwa mbere k’uyu mwaka. Mu kwa munani gushize, yagiranye n’ubushinjacyaha amasezerano yo kwemera ko yarenze ku mategeko ahana ibyaha birebana n’ibihano mpuzamahanga Amerka ifatira ibindi bihugu cyangwa abantu ku giti cyabo, n’icyaha n’iyezandonke, mu
nyungu za Oleg Deripaska. Ubushinjacyaha buvuga ko Deripaska yari guhemba McGonigal amadolari ari hagati oy’650,000 na miliyoni eshatu
Mu myanzuro ye, umucamanza yavuze ko Charles McGonigal yononeye cyane umutekano wa Leta zunze ubumwe z’Amerika, amukatira gufungwa imyaka ine n’amezi abiri, n’ihazabu y’amadolari ibihumbi 40. (Reuters, AP)
Forum