Umwungere wa Ekleziya Katorika, Papa Fransisiko, asaba abategesti b'isi gushiraho amategeko mpuzamakungu agenzura ikoreshwa ry'ubwenge mpimbano.
Papa Fransisiko afise amakenga ko ubwenge mpimbano buriko buranyanga kiremwamuntu ubuntu bwiwe, bwongera bwinjiza isi mu co yise " Igitugu c'Ubuhinga bwa none". Ibindi kuri ino nkuru na mugenzi wacu Diane Nininahazwe.
Ikete Papa Fransisiko yarungikiye indongozi z’isi, zirimwo n’ishirahamwe mpuzamakungu, ONU, yaryise “ Ubwenge mpimbano n’amahoro.”
Ni ikete arungikira abategetsi b’isi ku mwaka ku mwaka, ririmwo ubutumwa Ekleziya Katorika itanga ku munsi wahariwe amahoro. Ekleziya katorika ihimbaza uwo munsi igenekerezo rya mbere z’ukwezi kwa mbere.
Papa Fransisiko yanditse ati: “Umuvuduko ubwenge mpimbano buriko, urerekana neza ko hambavu y’uruhara rw’amareta mu kubugenzura, amashirahamwe mpuzamakungu nayo afise ico yoterera mw’ishirwaho n’igenzurwa ry’amategeko agenga ubwo bwenge.”
Ubwenge mpimbano burashobora kuyaga n’umuntu, bukandika biciye mu mashine nyabwonko, bukishura n’ibibazo umuntu abubajije.
Mu gihe ibigo bimwe bimwe, birimwo nka Microsoft na Google bibandanya kuvumbura ubwoko butandukanye bw’ubwo bwenge, Papa Fransisiko asaba indongozi z’isi kugenzura zitonze inyungu ababukora bafise muri bwo, n’ikibatuma kubukora.
Papa Fransisiko yavuze ko ba nyene ubwo bwenge bashobora kuzobangamira isi, bagatuma umuntu “yibura mu kurondera kwigenga, gutyo akagenzurwa n’igitugu c’ubuhinga bwa none”
Mw’ikete ryiwe, yatanze akarorero k’umugambi wo gukoresha ubwo bwenge mpimbano mu vy’ibirwanisho ruhonyanganda avuga ko, ibirwanisho bitagenzurwa n’umuntu, bidatoranya mu gutikiza.
Yagize ati: “Hari ingingo zifatwa n’umuntu, zidakwiriye guheberwa amamashini”.
Kardinali Michael Czerny, ajejwe ivy’iterambere rya kiremwamuntu I Vatikano, yabwiye abamenyeshamakuru mu kiganiro yabahaye agaruka kuri ubwo butumwa bwa Papa Fransisiko, ko budasigura ko adashigikiye iterambere ry’ubuhinga bwa none.
Yavuze ko Papa ashigikiye gose iterambere rya siyansi na tekinoroji, ariko mu gihe bifasha abantu.
Forum